Sudhakar Badgujar | नाशिकच्या राजकारणात सध्या भाजप नेते सुधाकर बडगुजर हे चर्चेच्या केंद्रस्थानी आले आहेत. शिवसेना ठाकरे गटातून भाजपमध्ये प्रवेश केलेल्या बडगुजर यांच्या राजकीय वाटचालीसोबतच त्यांच्या संपत्तीत झालेली झपाट्याने वाढ सर्वांचे लक्ष वेधून घेत आहे. महापालिका निवडणुकीसाठी सादर केलेल्या प्रतिज्ञापत्रातून ही बाब समोर आली आहे.

2024 च्या विधानसभा निवडणुकीच्या वेळी अवघ्या पावणेदोन कोटी रुपयांची एकूण मालमत्ता असलेले सुधाकर बडगुजर अवघ्या एका वर्षात साडेसहा कोटी रुपयांचे मालक झाल्याचे प्रतिज्ञापत्रात नमूद आहे. इतक्या कमी कालावधीत तिपटीने वाढलेली संपत्ती ही नाशिकच्या राजकीय वर्तुळात चर्चेचा विषय ठरली आहे.

ठेकेदार ते भाजप नेते; वादग्रस्त राजकीय प्रवास :

सुधाकर बडगुजर यांनी महापालिकेत ठेकेदार म्हणून आपल्या कारकिर्दीची सुरुवात केली होती. पुढे शिवसेना ठाकरे गटात सक्रिय भूमिका बजावत त्यांनी राजकारणात प्रवेश केला. खासदार संजय राऊत यांचे निकटवर्तीय म्हणून त्यांची ओळख निर्माण झाली होती, त्यामुळे पक्षांतर्गत आणि महापालिकेत त्यांना महत्त्वाच्या जबाबदाऱ्या मिळाल्या.

मात्र मुंबई बॉम्बस्फोटातील आरोपी सलीम कुत्ता याच्यासोबत पार्टी केल्याच्या आरोपामुळे बडगुजर मोठ्या अडचणीत आले होते. या प्रकरणानंतर त्यांच्यावर एसआयटी चौकशी झाली आणि नाशिक पश्चिम विधानसभा मतदारसंघातून त्यांचा पराभव झाला. या पराभवानंतर त्यांनी भाजपमध्ये प्रवेश केल्याने राजकीय वाद आणखी तीव्र झाला.

Sudhakar Badgujar | प्रतिज्ञापत्रातून उघड संपत्तीचा तपशील :

सध्या प्रभाग क्रमांक 25 अ मधून भाजपच्या तिकीटावर महापालिका निवडणूक लढवणाऱ्या सुधाकर बडगुजर यांच्या प्रतिज्ञापत्रात संपत्तीचा सविस्तर तपशील देण्यात आला आहे. शेती आणि व्यापार व्यवसाय करणाऱ्या बडगुजर कुटुंबाचे वार्षिक उत्पन्न 14 लाख 44 हजार रुपयांहून अधिक असल्याचे नमूद आहे.

प्रतिज्ञापत्रानुसार, बडगुजर दाम्पत्याकडे नाशिक आणि जळगाव येथे स्थावर मालमत्ता असून एकूण स्थावर मालमत्तेची किंमत 4 कोटी 11 लाख रुपयांपर्यंत आहे. त्यांच्याकडे 2 कोटी 42 लाख रुपयांची जंगम मालमत्ता, महिंद्रा स्कॉर्पिओ वाहन आणि सुमारे 515 ग्रॅम सोनं असल्याची नोंद आहे. विशेष म्हणजे या कोट्यवधी संपत्तीसोबत कोणतेही कर्ज किंवा दायित्व नसल्याचेही प्रतिज्ञापत्रात स्पष्ट करण्यात आले आहे. (Sudhakar Badgujar News)

2024 च्या विधानसभा निवडणुकीत 1 कोटी 79 लाख रुपयांची संपत्ती असलेले सुधाकर बडगुजर अवघ्या वर्षभरात साडेसहा कोटींच्या संपत्तीपर्यंत पोहोचल्याने त्यांच्या पक्षांतरासह ही आर्थिक वाढ नाशिकच्या राजकारणात मोठ्या चर्चेचा विषय ठरली आहे.

News Title : Sudhakar Badgujar’s Wealth Triples in a Year, Assets Rise from ₹1.75 Crore to ₹6.5 Crore

सुधाकर बडगुजर, नाशिक राजकारण, महापालिका निवडणूक 2026, संपत्ती वाढ, भाजप नेते
Sudhakar Badgujar, Nashik Municipal Election 2026, BJP Leader, Political Wealth, Maharashtra Politics