Rohit Sharma | आयसीसी टी-20 विश्वचषक 2026 च्या अंतिम सामन्यात भारताने न्यूझीलंडवर मोठा विजय मिळवत पुन्हा एकदा इतिहास रचला. अंतिम लढतीत भारताने तब्बल 96 धावांनी प्रतिस्पर्ध्यावर मात केली आणि सलग दुसऱ्यांदा टी-20 विश्वचषक जिंकण्याचा मान मिळवला. तसेच एकूण तिसऱ्यांदा हा किताब जिंकणारा भारत पहिला संघ ठरला. या ऐतिहासिक विजयानंतर टीम इंडियाच्या जल्लोषाची सर्वत्र चर्चा सुरू असताना कर्णधार रोहित शर्मा आणि त्याची पत्नी रितिका सजदेह यांचा एक व्हिडिओ सोशल मीडियावर मोठ्या प्रमाणात व्हायरल होत आहे.
व्हिडिओमागील नेमकं कारण काय? :
फायनलपूर्वी नरेंद्र मोदी स्टेडियममध्ये टिपलेला हा व्हिडिओ असल्याचा दावा केला जात आहे. क्लिपमध्ये रोहित आणि रितिका काहीतरी गंभीर चर्चा करताना दिसतात. रितिका रोहितशी काहीतरी समजावून सांगताना दिसते, तर रोहितही तिच्याकडे लक्ष देऊन बोलताना दिसतो. मात्र त्यांच्या हावभावांमुळे दोघांमध्ये वाद झाला का, असा प्रश्न चाहत्यांना पडला आहे. काही सोशल मीडिया यूजर्सनी तर या व्हिडिओच्या आधारे दोघांमध्ये भांडण झाल्याचाही अंदाज व्यक्त केला आहे.
This is how couples look in real life, not like the ‘My wife, my girlfriend, my this, my that, I am alive because of you’ type all the time pic.twitter.com/UeGOIAEAQb
— Prayag (@theprayagtiwari) March 9, 2026
दरम्यान, या व्हिडिओमागील नेमकं कारण काय आहे, याबाबत कोणतीही अधिकृत माहिती समोर आलेली नाही. त्यामुळे हा केवळ साधा संवाद होता की काही वेगळं, याबाबत स्पष्टता नाही. मात्र फायनलच्या आधीचा हा क्षण कॅमेऱ्यात कैद झाल्यामुळे सोशल मीडियावर चर्चेला उधाण आले आहे.
Rohit Sharma | कोण आहे रितिका सजदेह? :
रितिका सजदेह या भारतीय क्रिकेटपटू रोहित शर्माची पत्नी असून त्या व्यावसायिक स्पोर्ट्स मॅनेजर म्हणून ओळखल्या जातात. त्यांचा जन्म 21 डिसेंबर 1987 रोजी मुंबई येथे झाला. त्यांचे वडील बॉबी सजदेह तर आई टीना सजदेह आहेत.
रितिकाने स्पोर्ट्स मॅनेजमेंट क्षेत्रात करिअरची सुरुवात केली आणि ‘Cornerstone Sport & Entertainment’ या कंपनीत स्पोर्ट्स मॅनेजर म्हणून काम केले. या कामात खेळाडूंचे ब्रँड एंडोर्समेंट, जाहिरात करार आणि इतर व्यावसायिक व्यवहारांचे व्यवस्थापन करण्याची जबाबदारी असते.
रितिका अनेकदा रोहितच्या सामन्यांदरम्यान स्टेडियममध्ये उपस्थित राहून त्याला प्रोत्साहन देताना दिसतात. तसेच त्या सोशल मीडियावरही सक्रिय असतात. रोहित शर्माच्या यशामागे रितिका सजदेह यांचा मोठा पाठिंबा असल्याचे अनेकदा सांगितले जाते.
