Pakistan Blast | पाकिस्तान (Pakistan) मधील क्वेटा (Quetta) शहरात रेल्वे ट्रॅकजवळ झालेल्या भीषण स्फोटामुळे मोठी जीवितहानी झाली आहे. या दुर्घटनेत किमान 23 जणांचा मृत्यू झाला असून 47 जण जखमी झाल्याची माहिती समोर आली आहे. स्फोटानंतर परिसरात भीतीचे वातावरण निर्माण झाले असून प्रशासनाने तातडीने बचावकार्य सुरू केले आहे.
रेल्वे ट्रॅकजवळ शक्तिशाली स्फोट :
क्वेटा शहरातील रेल्वे मार्गाजवळ हा स्फोट झाला. स्फोट इतका तीव्र होता की आसपासच्या परिसरात मोठा आवाज झाला आणि नागरिकांमध्ये घबराट पसरली. घटनेनंतर जखमींना तातडीने रुग्णालयात हलवण्यात आले. सरकारी रुग्णालयांमध्ये आणीबाणी जाहीर करण्यात आली असून वैद्यकीय यंत्रणा सतर्क करण्यात आली आहे. या स्फोटामुळे एक मालगाडी रुळावरून घसरल्याची माहितीही समोर आली आहे. संबंधित ट्रेन क्वेटा कँट परिसराच्या दिशेने जात असताना रेल्वे लाईनवर हा स्फोट घडल्याचे सांगितले जात आहे.
स्फोटानंतर काही वेळ परिसरात गोळीबाराचे आवाजही ऐकू आल्याने नागरिकांमध्ये भीतीचे वातावरण निर्माण झाले. बलुचिस्तान (Balochistan) सरकारचे अधिकारी बाबर युसूफजई (Babar Yousafzai) यांनी सांगितले की, पोलीस, सुरक्षा दल आणि बचाव पथके तातडीने घटनास्थळी रवाना झाली आहेत. स्फोटामागील कारणांचा तपास सुरू असून अद्याप कोणत्याही संघटनेने हल्ल्याची जबाबदारी स्वीकारलेली नाही. बलुचिस्तानमध्ये अनेक वर्षांपासून हिंसाचार आणि फुटीरतावादी कारवाया सुरू असल्याने या घटनेकडे गंभीरतेने पाहिले जात आहे.
Pakistan Blast | ट्रेनचे डबे रुळावरून घसरले :
रेल्वे अधिकाऱ्यांच्या माहितीनुसार, क्वेटा कँटहून येणाऱ्या शटल ट्रेनला चमन फाट्याजवळ लक्ष्य करण्यात आले. स्फोटामुळे इंजिनासह ट्रेनचे तीन डबे रुळावरून खाली उतरले, तर दोन डबे उलटल्याचे सांगण्यात आले. याशिवाय परिसरातील पार्किंगमध्ये उभ्या असलेल्या सुमारे दहा वाहनांचेही नुकसान झाले आहे. स्फोटाच्या धक्क्याने जवळच्या इमारतींच्या काचा फुटल्या असून परिसर सील करण्यात आला आहे. बचाव आणि मदतकार्य युद्धपातळीवर सुरू असल्याची माहिती प्रशासनाने दिली.
या घटनेनंतर खबरदारीचा उपाय म्हणून पेशावर (Peshawar) येथे जाणारी जाफर एक्सप्रेस (Jaffar Express) क्वेटा रेल्वे स्थानकावर थांबवण्यात आली आहे. पाकिस्तानचे रेल्वे मंत्री मोहम्मद हनीफ अब्बासी (Mohammad Hanif Abbasi) यांनी या घटनेचा तीव्र शब्दांत निषेध केला आहे. त्यांनी हा भ्याड दहशतवादी हल्ला असल्याचे म्हटले असून, अशा हल्ल्यांमुळे पाकिस्तानचा दहशतवादाविरोधातील लढा कमकुवत होणार नाही, असे स्पष्ट केले. अडकलेल्या प्रवाशांना बाहेर काढण्यासाठी मदत ट्रेन आणि बचाव पथके पाठवण्यात आल्याचेही त्यांनी सांगितले. तसेच या घटनेचा सविस्तर अहवाल अधिकाऱ्यांकडून मागवण्यात आला आहे.
