Pune News | पुणे (Pune) शहरात कौटुंबिक हिंसाचाराचा एक अत्यंत धक्कादायक आणि संतापजनक प्रकार उघडकीस आला आहे. मुलबाळ होत नसल्याच्या कारणावरून एका पतीने आपल्याच पत्नीला मित्रासोबत शारीरिक संबंध ठेवण्यास भाग पाडल्याचा आरोप आहे. इतकेच नव्हे, तर हा पती आपल्या मित्राला याच उद्देशाने घरी घेऊन आला, जिथे मित्राने महिलेचा विनयभंग केल्याचेही पीडितेने म्हटले आहे. याप्रकरणी पीडित महिलेने पोलिसांत धाव घेतली आहे.
पतीची मागणी
मिळालेल्या माहितीनुसार, २५ वर्षीय पीडित महिलेला मुलबाळ होत नसल्याने तिचा ३० वर्षीय पती नाराज होता. यातूनच त्याने आपल्या एका ५० वर्षीय मित्राला पत्नीसोबत शारीरिक संबंध ठेवण्यास सांगितले, जेणेकरून तिला मूल होईल. धक्कादायक म्हणजे, एके दिवशी पतीने आपल्या मित्राला याच इराद्याने घरी आणले. त्यावेळी मित्राने पीडित महिलेकडे एकटक बघत तिचा विनयभंग केला.
यानंतरही पतीच्या मित्राचा त्रास थांबला नाही. तो पीडित महिलेला सतत मेसेज आणि फोन करून त्रास देऊ लागला. ‘तुझा पती तुझ्यासोबत शारीरिक संबंध ठेवू शकत नाही, म्हणून त्यानेच मला तुझ्यासोबत संबंध ठेवून मुलबाळ करून देण्यास सांगितले आहे,’ अशा आशयाचे मेसेज तो पाठवत होता. पतीच्या संमतीचा हवाला देऊन तो महिलेवर जवळीक साधण्यासाठी दबाव आणत होता. हा प्रकार २१ जुलै २०२३ ते २ मार्च २०२५ या कालावधीत सुरू असल्याचे तक्रारीत म्हटले आहे.
Pune News | पीडितेचा छळ
पीडित महिलेने आपल्या तक्रारीत म्हटले आहे की, तिचा पती तिला शिवीगाळ करून मारहाण देखील करत असे. मित्राला घरी आणल्यानंतर त्याने विनयभंग केला आणि एकांतात गैरफायदा घेण्याचाही प्रयत्न केला, परंतु तिने त्याला विरोध केला. पती आणि त्याच्या मित्राकडून होणाऱ्या या शारीरिक आणि मानसिक छळाला कंटाळून अखेर पीडित महिलेने हिंमत दाखवून खडक पोलीस स्टेशन (Khadak Police Station) गाठले.
तिने दिलेल्या सविस्तर तक्रारीच्या आधारे खडक पोलिसांनी तिचा पती आणि पतीचा मित्र या दोघांविरुद्ध गुन्हा दाखल केला आहे. पोलिसांनी या प्रकरणाचा तपास सुरू केला असून, आरोपींवर कायदेशीर कारवाई केली जात आहे. समाजात आजही महिलांवर अशा प्रकारचे अत्याचार होत असल्याचे हे उदाहरण असून, या घटनेने तीव्र संताप व्यक्त होत आहे.
