Petrol Diesel Price Update | मध्यपूर्वेतील वाढत्या तणावाचा परिणाम आता भारतातील इंधन दरांवर दिसू लागला आहे. अलीकडच्या काही दिवसांत जागतिक बाजारात कच्च्या तेलाच्या किमती वाढल्यामुळे प्रीमियम इंधन आणि औद्योगिक वापरासाठी लागणाऱ्या डिझेलच्या दरात वाढ करण्यात आली आहे. मात्र सामान्य नागरिक वापरत असलेल्या पेट्रोल-डिझेलच्या दरात सध्या कोणताही बदल करण्यात आलेला नाही. (Petrol Diesel Price Update)
प्रीमियम पेट्रोल आणि औद्योगिक डिझेलमध्ये वाढ :
इराण (Iran) आणि इस्रायल (Israel) यांच्यातील संघर्षामुळे आंतरराष्ट्रीय बाजारात कच्च्या तेलाच्या किमती झपाट्याने वाढल्या आहेत. कच्चे तेल (Crude Oil) प्रति बॅरल 108 ते 119 डॉलरपर्यंत पोहोचल्याने देशातील तेल कंपन्यांनी शुक्रवारी रात्री प्रीमियम इंधनाच्या किमतीत बदल केला. नव्या दरांनुसार प्रीमियम पेट्रोलच्या दरात प्रति लिटर सुमारे 2 रुपयांची वाढ झाली आहे. राजधानी दिल्ली (Delhi) येथे या प्रकारच्या पेट्रोलची किंमत आता 101.89 रुपये प्रति लिटर इतकी झाली आहे.
त्याचवेळी मोठ्या उद्योगांमध्ये, टेलिकॉम टॉवर्समध्ये किंवा व्यावसायिक वापरासाठी वापरल्या जाणाऱ्या औद्योगिक डिझेलच्या किमतीत मोठी वाढ झाली आहे. या प्रकारच्या डिझेलच्या दरात एकदम 20 ते 22 रुपयांची वाढ नोंदवण्यात आली आहे. आर्थिक राजधानी मुंबई (Mumbai) येथे औद्योगिक डिझेलचा दर आता 113.11 रुपये प्रति लिटरवर पोहोचला आहे. त्यामुळे मोठ्या उद्योगांसाठी इंधन खर्चात वाढ होण्याची शक्यता व्यक्त केली जात आहे.
Petrol Diesel Price Update | सामान्य पेट्रोल-डिझेल दर स्थिर :
दरम्यान, पेट्रोलियम मंत्रालय (Ministry of Petroleum and Natural Gas) यांनी स्पष्ट केले आहे की सर्वसामान्य वाहनचालक वापरत असलेल्या पेट्रोल आणि डिझेलच्या दरात सध्या कोणतीही वाढ करण्याचा निर्णय घेतलेला नाही. त्यामुळे दिल्लीमध्ये सामान्य पेट्रोलचा दर 94.77 रुपये प्रति लिटर तर डिझेलचा दर 87.67 रुपये प्रति लिटर इतकाच कायम ठेवण्यात आला आहे. प्रीमियम पेट्रोलचा देशातील एकूण वापर केवळ 2 ते 4 टक्के इतकाच असल्यामुळे या दरवाढीचा थेट परिणाम सर्वसामान्य ग्राहकांवर होणार नसल्याचेही सांगण्यात आले आहे. (Petrol Diesel Price Update)
या दरवाढीमागे जागतिक पुरवठा साखळीवरील ताण महत्त्वाचा घटक मानला जात आहे. भारत आपल्या कच्च्या तेलाच्या सुमारे 88 टक्के गरजा आयातीद्वारे पूर्ण करतो. होर्मुझ सामुद्रधुनी (Strait of Hormuz) परिसरातील वाढलेल्या धोक्यामुळे जहाजांचे मार्ग बदलावे लागत आहेत आणि प्रवासाचा कालावधी वाढत आहे. याशिवाय वाहतुकीवरील विमा खर्चही वाढला असून पुरवठा साखळीवर अतिरिक्त ताण पडत आहे.
या पार्श्वभूमीवर इंडियन ऑईल (Indian Oil Corporation Limited) सारख्या तेल कंपन्या सध्या कच्च्या तेलाच्या वाढलेल्या किमतींचा काही भाग स्वतः सहन करत असल्याचे सांगितले जाते. जागतिक बाजारात दर कमी असताना मिळालेल्या नफ्याचा वापर करून कंपन्या सध्या या वाढीव खर्चाची भरपाई करत आहेत. त्यामुळे देशांतर्गत इंधन दरांमुळे महागाई वाढू नये यासाठी प्रयत्न सुरू असल्याचे तज्ज्ञांचे मत आहे.
