मुंबईत 12 लाखांहूनही कमी किंमतीत घर घ्यायची संधी, अर्ज प्रक्रिया सुरू

On: March 18, 2025 8:37 AM

---Advertisement---

Mumbai MHADA Lottery | मुंबईत घर घेण्याचे स्वप्न पाहणाऱ्यांसाठी मोठी संधी उपलब्ध झाली आहे. माहुल (Mahul) येथे रिक्त असलेल्या म्हाडाच्या (Mumbai MHADA Lottery ) 13,000 घरांपैकी 9,098 घरे अवघ्या 12.50 लाखांत महानगरपालिका कर्मचाऱ्यांना विक्रीसाठी उपलब्ध करण्यात आली आहेत. या योजनेसाठी अर्ज प्रक्रिया सुरू झाली असून, पहिल्याच दिवशी 47 कर्मचाऱ्यांनी अर्ज भरले आहेत.

सोमवारी सुरू झालेल्या या अर्ज प्रक्रियेला चांगला प्रतिसाद मिळाला आहे. पहिल्या दिवशी 47 कर्मचाऱ्यांनी अर्ज भरले, त्यापैकी 21 कर्मचाऱ्यांनी अनामत रक्कमही भरली आहे. ही घरे चेंबूर-माहुल परिसरात उभारण्यात आली होती, मात्र प्रकल्पबाधित कुटुंबांनी येथे राहण्यास नकार दिल्यामुळे ती रिकामी राहिली आहेत. आता महानगरपालिकेने या घरांची विक्री करण्याचा निर्णय घेतला आहे.

माहुलमधील घरांचा वाद आणि रिक्त राहण्याचे कारण

माहुल परिसरात विविध पुनर्वसन प्रकल्पांतर्गत हजारो घरे बांधण्यात आली होती. मात्र, या भागात अनेक रासायनिक प्रकल्प आणि तेलशुद्धीकरण कारखाने असल्याने प्रचंड प्रदूषण आहे. या प्रदूषणामुळे अनेक रहिवाशांना दमा, टीबी आणि इतर गंभीर श्वसनाचे आजार झाल्याच्या तक्रारी आल्या. त्यामुळे रहिवाशांनी येथे पुनर्वसनास विरोध दर्शवला आणि न्यायालयाने देखील येथे जबरदस्तीने पुनर्वसन न करण्याचे निर्देश दिले. परिणामी, तब्बल 13,000 घरे आजही रिक्त आहेत.

घरांसाठी अर्ज प्रक्रिया आणि महत्त्वाच्या तारखा

ऑनलाइन अर्ज सुरू – 15 मार्च
अर्ज करण्याची अंतिम तारीख – 15 एप्रिल
सोडतीसाठी अंतिम यादी प्रसिद्ध होण्याची तारीख – 16 एप्रिल
घरांची संपूर्ण रक्कम भरण्याची शेवटची तारीख – 12 ऑक्टोबर

म्हाडाच्या लॉटरीप्रमाणेच या घरांचे वितरण लॉटरी पद्धतीने करण्यात येणार आहे. अर्जदारांनी 15 एप्रिलपूर्वी अर्ज सादर करावा, त्यानंतर सोडत काढून पात्र अर्जदारांना घरे वितरित केली जातील.

माहुल परिसरातील प्रदूषण आणि रहिवाशांचा नकार

माहुल परिसरात आरसीएफ (RCF), भारत पेट्रोलियम (BPCL), हिंदुस्तान पेट्रोलियम (HPCL), टाटा पॉवर (Tata Power), इंडियन ऑइल (IOCL), ओएनजीसी (ONGC) यांसारख्या मोठ्या कंपन्यांचे रासायनिक प्रकल्प आणि तेलशुद्धीकरण प्रकल्प आहेत. त्यामुळे येथील वातावरण अत्यंत प्रदूषित असून, नागरिकांना येथे राहण्यास मोठ्या अडचणींचा सामना करावा लागत आहे. (Mumbai MHADA Lottery )

तरीही, महानगरपालिकेने या घरांना सवलतीच्या दरात विकण्याचा निर्णय घेतला असून, या योजनेला सकारात्मक प्रतिसाद मिळण्याची शक्यता आहे. इच्छुक अर्जदारांनी वेळेत अर्ज भरून या संधीचा लाभ घ्यावा.