Mumbai Indians | इंडियन प्रीमियर लीग (IPL 2025) आता अंतिम टप्प्यात पोहोचली असतानाच, मुंबई इंडियन्सने (Mumbai Indians) एक महत्त्वाचा निर्णय घेतला आहे. प्लेऑफसाठी पात्र ठरण्याच्या आशेने खेळणाऱ्या मुंबई इंडियन्सने तातडीने संघ बळकट करत तीन नव्या खेळाडूंना सामील करून घेतलं आहे. विशेष म्हणजे यामधील एक खेळाडू केवळ प्लेऑफ सामन्यांसाठी घेतला गेला असून त्याच्यासोबत 5.25 कोटी रुपयांचा करार करण्यात आला आहे.
आयपीएलमधील काही विदेशी खेळाडू त्यांच्या राष्ट्रीय कर्तव्यामुळे IPL मधून बाहेर पडत आहेत. त्यामुळे त्यांच्या जागी नवीन पर्याय शोधणे हे संघांसाठी अत्यावश्यक झाले आहे. याच पार्श्वभूमीवर मुंबई इंडियन्सने तातडीने तीन नवे रिप्लेसमेंट खेळाडू करारबद्ध केले आहेत.
जॉनी बेअरस्टोचा संघात समावेश; मुंबईला बळ मिळणार :
इंग्लंडचा आक्रमक फलंदाज आणि अनुभवी विकेटकीपर जॉनी बेअरस्टो (Jonny Bairstow) याला विल जॅक्सच्या जागी संघात घेतले आहे. मुंबई इंडियन्सने यासाठी 5.25 कोटी रुपये खर्च केले आहेत. केवळ प्लेऑफसाठी खेळवले जाणारे हा पहिला खेळाडू असल्याचे मानले जात आहे. बेअरस्टोच्या आगमनामुळे फलंदाजी लाईनअप अधिक मजबूत होणार आहे, असे तज्ज्ञांचे मत आहे.
प्लेऑफसारख्या निर्णायक सामन्यांमध्ये अनुभव आणि आक्रमकता या दोन्ही गोष्टींचं मोठं महत्त्व असतं. त्यामुळे बेअरस्टोची निवड ही मुंबई इंडियन्सच्या रणनीतीचा भाग असल्याचं स्पष्ट होत आहे.
Mumbai Indians | ग्लीसन व असलंका यांचाही समावेश; खेळाडूंचा फॉर्म महत्त्वाचा :
वेगवान गोलंदाज रायन रिकेल्टनच्या जागी इंग्लंडचा आणखी एक खेळाडू रिचर्ड ग्लीसन याला संघात स्थान देण्यात आलं आहे. त्याला 1 कोटी रुपयांच्या मूळ किमतीत करारबद्ध करण्यात आलं आहे. ग्लीसनची वेगवान गोलंदाजी मुंबईला प्लेऑफच्या दडपणाखाली महत्त्वाची ठरू शकते.
त्याचप्रमाणे, अष्टपैलू खेळाडू कॉर्बिन बॉशच्या जागी श्रीलंकेचा मधल्या फळीतला आक्रमक फलंदाज चरित असलंका याला संघात घेतलं गेलं आहे. त्याची मूळ किंमत 75 लाख रुपये आहे. असलंका गोलंदाजीसह फलंदाजीतही उपयोगी ठरणार आहे.
हे तिन्ही खेळाडू केवळ मुंबई इंडियन्स प्लेऑफमध्ये पोहोचल्यास उपलब्ध असतील, असं स्पष्ट करण्यात आलं आहे. म्हणजेच, मुंबईचा प्लेऑफपर्यंतचा प्रवास ठरताच हे खेळाडू थेट मैदानात उतरू शकतील.
प्लेऑफसाठी रणनिती; संघ बळकट करण्याचा प्रयत्न :
मुंबई इंडियन्सने ही तातडीची भरती करत संघात अनुभव आणि ताकद वाढवण्याचा प्रयत्न केला आहे. सध्या हार्दिक पांड्याच्या नेतृत्वाखालील मुंबई इंडियन्सचे प्रदर्शन चढउताराचे असले तरी, प्लेऑफसाठी संघ सज्ज आहे. या नव्या भरतीमुळे चाहत्यांमध्ये नव्याने आशा निर्माण झाली आहे.
प्लेऑफमध्ये पोहोचल्यास जॉनी बेअरस्टोची आक्रमकता, ग्लीसनचा वेग आणि असलंका याचे अष्टपैलूपण मुंबईच्या विजयात निर्णायक ठरू शकतात.
