Mouth Ulcers in Summer | उन्हाळा सुरू झाला की शरीरात उष्णता वाढणे, निर्जलीकरण आणि अनियमित आहारामुळे अनेक आरोग्याच्या समस्या उद्भवतात. त्यापैकी एक सामान्य पण त्रासदायक समस्या म्हणजे माऊथ अल्सर. तोंडात येणारे हे लहान फोड दिसायला किरकोळ असले तरी खाताना, बोलताना किंवा पाणी पितानाही तीव्र वेदना देऊ शकतात. त्यामुळे दैनंदिन जीवनावर त्याचा परिणाम होतो.
उष्ण हवामान, शरीरातील पाण्याची कमतरता, मसालेदार आणि तळलेले पदार्थ जास्त प्रमाणात खाणे किंवा अनियमित जेवण यामुळे तोंडातील अल्सरची समस्या वाढू शकते. काही वेळा पोषणातील कमतरता, पोटाचे विकार किंवा ताण-तणावही याला कारणीभूत ठरतात. वारंवार औषध घेण्यापेक्षा काही सोपे घरगुती उपायही या समस्येवर प्रभावी ठरू शकतात.
तोंडातील अल्सर होण्याची कारणे :
तोंडातील अल्सर म्हणजे तोंडाच्या आतील भागावर निर्माण होणारे वेदनादायक फोड. हे फोड जीभ, ओठांच्या आत, गालांच्या आतील भागावर किंवा हिरड्यांवर दिसू शकतात. पोषणातील कमतरता, विशेषतः व्हिटॅमिन B12, लोह, फॉलिक अॅसिड किंवा झिंकची कमतरता असल्यास ही समस्या अधिक जाणवते. (Summer Health Tips)
याशिवाय मानसिक ताण, थकवा, तोंडातील जखम, चुकीची दातांची रचना किंवा काही औषधांचे दुष्परिणाम यामुळेही अल्सर होऊ शकतात. बहुतेक वेळा हे फोड ७ ते १४ दिवसांत आपोआप बरे होतात. मात्र वारंवार मोठे फोड येत असतील किंवा रक्तस्राव होत असेल तर डॉक्टरांचा सल्ला घेणे आवश्यक आहे.
Mouth Ulcers in Summer | ‘हे’ घरगुती उपाय देऊ शकतात आराम :
तोंडातील अल्सरपासून आराम मिळवण्यासाठी काही सोपे घरगुती उपाय उपयोगी ठरू शकतात. मधामध्ये नैसर्गिक जीवाणूनाशक गुणधर्म असतात. त्यामुळे दिवसातून दोन-तीन वेळा अल्सरवर मध लावल्यास जळजळ कमी होण्यास मदत होते आणि फोड लवकर बरे होतात. (Mouth Ulcers in Summer)
नारळाचे तेलही या समस्येत उपयोगी मानले जाते. त्यातील दाहक-विरोधी गुणधर्म सूज आणि वेदना कमी करण्यात मदत करतात. कापसाच्या मदतीने फोडांवर दिवसातून दोनदा नारळाचे तेल लावल्यास आराम मिळू शकतो.
तुळशी, दूध आणि मिठाचे पाणी :
आयुर्वेदात Holy Basil म्हणजेच तुळशीला विशेष महत्त्व आहे. दररोज ३ ते ४ तुळशीची पाने चावून त्यानंतर पाणी पिल्यास तोंडातील जीवाणू कमी होतात आणि अल्सरपासून आराम मिळू शकतो.
याशिवाय थंड दूध किंवा दही पिणेही फायदेशीर ठरू शकते. यामुळे शरीरातील उष्णता कमी होते आणि फोडांमधील दाह कमी होतो. तसेच कोमट पाण्यात मीठ टाकून गुळण्या केल्यास तोंडातील जंतू नष्ट होऊन फोड लवकर बरे होण्यास मदत होते.
