Raj Thackeray | महानगरपालिका निवडणुकांच्या पार्श्वभूमीवर महाराष्ट्र नवनिर्माण सेनेला (मनसे) आणखी एक मोठा धक्का बसला आहे. संतोष धुरी यांच्या भाजप प्रवेशानंतर आता राज ठाकरे यांचे अत्यंत विश्वासू सहकारी मानले जाणारे नेतेही मनसेतून बाहेर पडले आहेत. या घडामोडीमुळे मनसेत खळबळ उडाली असून राजकीय वर्तुळात मोठी चर्चा सुरू झाली आहे. (Rajabhau Chaughule joins Shiv Sena)
राज ठाकरे आणि उद्धव ठाकरे यांच्या युतीमुळे मनसैनिक आणि शिवसैनिकांमध्ये उत्साहाचे वातावरण असतानाच, ऐन निवडणुकीच्या तोंडावर मनसेतील गळती वाढत असल्याचे चित्र दिसत आहे. युतीमुळे काही नेत्यांमध्ये अस्वस्थता निर्माण झाली असून त्याचा फटका थेट पक्षाला बसत असल्याचे बोलले जात आहे.
राजाभाऊ चौगुले यांचा शिवसेनेत प्रवेश :
मनसेचे माजी नगरसेवक आणि सरचिटणीस राजाभाऊ चौगुले यांनी अखेर राज ठाकरेंची साथ सोडली आहे. उपमुख्यमंत्री एकनाथ शिंदे (Eknath shinde) यांच्या उपस्थितीत त्यांनी शिवसेनेत जाहीर प्रवेश केला. राजाभाऊ चौगुले यांच्यासोबत मनसेचे अनेक प्रमुख पदाधिकारी आणि कार्यकर्त्यांनीही शिवसेनेत प्रवेश केल्याने मनसेला हा मोठा धक्का मानला जात आहे.
राजाभाऊ चौगुले यांच्यासह मनसेचे प्रवक्ते हेमंत कांबळे, मनसे चित्रपट सेनेचे सरचिटणीस राहुल तूपलोंढे, महाराष्ट्र नवनिर्माण विद्यार्थी सेनेचे संदेश शेट्टी, मुनव्वर शेख, जनहित कक्षाचे ॲड. देवाशीष मर्क, प्रथमेश बांदेकर आणि संतोष यादव यांनीही शिवसेनेचा झेंडा हाती घेतला आहे. या सामूहिक पक्षप्रवेशामुळे शिवसेनेची ताकद वाढली असून मनसेत अस्वस्थतेचे वातावरण आहे.
Raj Thackeray | राजाभाऊ चौगुले कोण आहेत? :
राजाभाऊ चौगुले हे राजकारणातले जुने आणि अनुभवी नेते म्हणून ओळखले जातात. विद्यार्थी सेनेपासून त्यांनी राज ठाकरे यांच्यासोबत खांद्याला खांदा लावून काम केले आहे. राज ठाकरे शिवसेनेतून बाहेर पडल्यानंतर चौगुले यांनीही शिवसेनेला रामराम ठोकत मनसेत प्रवेश केला होता आणि अनेक वर्षे सक्रिय काम केले.
यानंतर त्यांनी पुन्हा एकदा शिवसेनेत प्रवेश केला आणि शिवसेनेच्या तिकिटावर नगरसेवक म्हणून निवडून आले. महापालिकेत त्यांनी विधी समितीचे अध्यक्षपदही भूषवले होते. चेंबूर-टिळकनगर परिसरात त्यांचा चांगला जनसंपर्क असून त्यांनी घाटकोपरमधून अपक्ष म्हणून विधानसभा निवडणूकही लढवली होती, मात्र त्यात यश आले नव्हते. (Rajabhau Chaughule joins Shiv Sena)
राज ठाकरेंना राजकीय धक्का :
आता पुन्हा एकदा राजाभाऊ चौगुले (Rajabhau Chaughule) यांनी एकनाथ शिंदे (Eknath shinde) यांच्या नेतृत्वाखालील शिवसेनेत प्रवेश केल्याने मनसेसाठी हा मोठा राजकीय धक्का मानला जात आहे. संतोष धुरीनंतर आणखी एका जवळच्या सहकाऱ्याने साथ सोडल्यामुळे राज ठाकरे यांच्यासमोर संघटनात्मक आव्हान उभे राहिले आहे.
महानगरपालिका निवडणुकांच्या पार्श्वभूमीवर मनसेतील ही गळती थांबते की वाढते, याकडे आता संपूर्ण राज्याचे लक्ष लागले आहे.
