Maharashtra Weather Update | डिसेंबर महिन्याच्या अखेरीस महाराष्ट्राच्या हवामानात मोठी उलथापालथ पाहायला मिळत आहे. उत्तरेकडून वाहणाऱ्या थंड वाऱ्यांमुळे राज्यात थंडीचा प्रभाव लक्षणीयरीत्या वाढला असून किमान तापमानात सातत्याने घट होत आहे. सकाळ आणि रात्रीच्या वेळी बोचरी थंडी जाणवत असून नागरिकांना गारठ्याचा सामना करावा लागत आहे.
मुंबई, ठाणे(Thane), नवी मुंबई (Navi Mumbai), पुणे (Pune) यांसह राज्यातील अनेक भागांत थंडीचा प्रभाव वाढल्याचे चित्र आहे. भारतीय हवामान विभागाने (IMD) पुढील काही दिवस हवामान कोरडे राहणार असल्याचा अंदाज वर्तवला असून पावसाची कोणतीही शक्यता नसल्याचे स्पष्ट केले आहे.
किमान तापमानात घट; सकाळी गारठा, दिवसा सौम्य ऊन :
उत्तरेकडून येणाऱ्या थंड हवेच्या प्रवाहामुळे राज्यातील किमान तापमानात मोठी घट झाली आहे. ढगविरहित आकाशामुळे रात्री उष्णता लवकर निघून जात असून पहाटे आणि रात्री गारठा अधिक जाणवत आहे. काही भागांत सकाळच्या वेळी हलके धुकेही दिसून येत आहे.
दुपारनंतर सूर्यप्रकाशामुळे तापमानात किंचित वाढ होत असली तरी थंडीचा प्रभाव पूर्णपणे कमी होत नसल्याचे जाणवत आहे. विशेषतः सकाळी थंड वारे आणि आर्द्रतेमुळे थंडी अधिक तीव्र वाटत आहे.
Maharashtra Weather Update | मुंबई, पुणे आणि अंतर्गत भागांचा हवामान अंदाज :
कोकण पट्ट्यात हवामान कोरडे आणि तुलनेने सौम्य राहणार असून मुंबई, ठाणे आणि नवी मुंबईत कमाल तापमान 31 ते 32 अंश सेल्सिअसदरम्यान राहण्याची शक्यता आहे. किमान तापमान 18 ते 20 अंशांपर्यंत घसरण्याचा अंदाज असून सकाळच्या वेळी काही ठिकाणी हलके धुके जाणवेल. (Maharashtra Weather Update)
पुणे शहर आणि परिसरात थंडीचा जोर अधिक असून किमान तापमान 10 ते 12 अंश सेल्सिअसपर्यंत खाली जाण्याची शक्यता आहे. पश्चिम महाराष्ट्र, उत्तर महाराष्ट्र, मराठवाडा आणि विदर्भातील अनेक भागांत थंडी अधिक तीव्र झाली असून काही ठिकाणी किमान तापमान 10 अंशांच्या खाली नोंदवले गेले आहे. पुढील काही दिवस राज्यात हीच परिस्थिती कायम राहणार असून नागरिकांनी गारठ्यापासून बचावासाठी आवश्यक खबरदारी घेण्याचे आवाहन करण्यात आले आहे.
