Ladki Bahin Yojana | राज्यातील महिलांसाठी राबवण्यात आलेल्या मुख्यमंत्री माझी लाडकी बहीण (Mukhyamantri Majhi Ladki Bahin Yojana) योजनेअंतर्गत जानेवारी महिन्याचा हप्ता अखेर पात्र लाभार्थ्यांच्या बँक खात्यात जमा होऊ लागला आहे. अनेक दिवस प्रतीक्षा केल्यानंतर महिलांना दिलासा मिळाला असून आता पुढील हप्त्याबाबत उत्सुकता वाढली आहे.
जानेवारीचा हप्ता खात्यात; 98 कोटींची तरतूद :
विधीमंडळाच्या अर्थसंकल्पीय अधिवेशनात (Budget 2026) राज्य सरकारने महिलांना दिलासा देणारा निर्णय जाहीर केला. जानेवारी महिन्याची आर्थिक मदत लाभार्थ्यांच्या खात्यात वर्ग करण्याची प्रक्रिया सुरू करण्यात आली. त्यामुळे राज्यभरातील पात्र महिलांच्या प्रतीक्षेला पूर्णविराम मिळाला.
या निधीसाठी सामाजिक न्याय विभागाने (Social Justice Department) 18 फेब्रुवारी रोजी महिला व बालविकास विभागाकडे (Women and Child Development Department) तब्बल 98 कोटी रुपयांचा निधी हस्तांतरित केला होता. ही रक्कम प्राप्त होताच लाभार्थ्यांच्या खात्यात हप्ते जमा करण्याची कार्यवाही वेगाने पूर्ण करण्यात आली. यापूर्वी डिसेंबर 2025 चा हप्ता जानेवारी महिन्यात जमा करण्यात आला होता, तर आता जानेवारीचा हप्ता फेब्रुवारीच्या अखेरीस वर्ग करण्यात आला आहे.
Ladki Bahin Yojana | फेब्रुवारी हप्ता प्रलंबित; ई-केवायसी अनिवार्य :
दरम्यान, फेब्रुवारी महिना संपण्यास अवघे चार दिवस उरले असतानाही या महिन्याचा हप्ता नेमका कधी जमा होणार याबाबत सरकारकडून अद्याप अधिकृत घोषणा करण्यात आलेली नाही. त्यामुळे महिलांकडून पुढील हप्त्याबाबत चौकशी सुरू आहे.(Ladki Bahin Yojana January Installment)
सरकारने ई-केवायसी प्रक्रिया सक्तीची केल्यानंतर अनेक लाभार्थ्यांची नावे यादीतून वगळण्यात आली आहेत. काही महिलांना तांत्रिक अडचणींचा सामना करावा लागत असल्याने ई-केवायसी पूर्ण करण्याची मुदत 31 मार्च 2026 पर्यंत वाढवण्यात आली आहे. ही योजना जुलै 2024 पासून सुरू असून पात्र महिलांच्या खात्यात दरमहा 1500 रुपये जमा केले जात आहेत. पात्रतेच्या निकषात बसत नसलेल्या आणि ई-केवायसीत अपात्र ठरलेल्या महिलांना यादीतून वगळण्यात आले आहे.
