Kolhapur Cricket Stadium | क्रिकेट हा भारताचा जिव्हाळ्याचा खेळ मानला जातो आणि महाराष्ट्रातही त्याचं वेड मोठ्या प्रमाणावर पाहायला मिळतं. आता कोल्हापूरकरांसाठी मोठी आनंदवार्ता समोर आली आहे. करवीर तालुक्यातील विकासवाडी येथे अत्याधुनिक आंतरराष्ट्रीय क्रिकेट स्टेडियम उभारण्याचा निर्णय राज्य सरकारने घेतला असून यामुळे जिल्ह्यातील क्रीडाप्रेमींचा उत्साह वाढला आहे.
मंत्रिमंडळाचा निर्णय आणि जमिनीची मंजुरी :
मुख्यमंत्री देवेंद्र फडणवीस (Devendra Fadnavis) यांच्या अध्यक्षतेखाली १० फेब्रुवारी २०२६ रोजी झालेल्या मंत्रिमंडळ बैठकीत या प्रकल्पाला हिरवा कंदील देण्यात आला. स्टेडियमसाठी १२ हेक्टर ७६ आर इतकी शासकीय जमीन विनामूल्य देण्यास मान्यता देण्यात आली आहे. मागील तीन दशकांपासून कोल्हापुरात आंतरराष्ट्रीय दर्जाच्या मैदानासाठी सातत्याने पाठपुरावा सुरू होता. आता हा प्रयत्न प्रत्यक्षात येण्याच्या मार्गावर असल्याचे चित्र आहे.
कोल्हापूर जिल्हा क्रिकेट असोसिएशन (Kolhapur District Cricket Association) यांनी केलेल्या मागणीनुसार क्रीडा विभागाकडून प्राथमिक आराखडा तयार करून शासनाकडे सादर करण्यात आला होता. त्यानंतर राज्य सरकारने सकारात्मक भूमिका घेत निर्णय जाहीर केला. प्रस्तावित स्टेडियम आयसीसी (International Cricket Council – ICC) च्या निकषांनुसार विकसित करण्यात येणार असल्याची माहिती देण्यात आली आहे.
Kolhapur Cricket Stadium | राजकीय प्रयत्न आणि स्थानिकांचा उत्साह :
या प्रकल्पासाठी माजी खासदार संभाजीराजे छत्रपती (Sambhajiraje Chhatrapati), खासदार धनंजय महाडिक (Dhananjay Mahadik) आणि आमदार अमल महाडिक (Amal Mahadik) यांनी शासन स्तरावर पाठपुरावा केल्याचे समजते. शासनाच्या निर्णयाचे स्थानिक पातळीवर स्वागत करण्यात आले असून विधान परिषद गटनेते सतेज पाटील (Satej Patil) यांनीही या उपक्रमामुळे जिल्ह्यातील क्रीडा सुविधांना नवे बळ मिळेल, अशी प्रतिक्रिया दिली आहे.
स्टेडियम संकुलात मुख्य आंतरराष्ट्रीय मैदानासोबत स्वतंत्र सराव मैदानाची उभारणी केली जाणार आहे. खेळाडूंकरिता अत्याधुनिक बदलाखाने, जिम आणि अन्य सुविधा उपलब्ध असतील. प्रेक्षकांसाठी प्रशस्त गॅलरी, मोठी पार्किंग व्यवस्था आणि माध्यम प्रतिनिधींसाठी स्वतंत्र सुविधा दिल्या जातील. पाणीपुरवठा, वीज आणि ड्रेनेज यंत्रणा नियोजनबद्ध पद्धतीने उभारली जाईल. पर्यावरणीय निकषांचे पालन करत संपूर्ण प्रकल्प राबवण्यात येणार असून सुमारे २० ते ३५ हजार प्रेक्षकांच्या आसनव्यवस्थेची तरतूद करण्यात येणार आहे.
