Heart Attack | आजकाल बदललेली जीवनशैली, व्यायामाचा अभाव, ताणतणाव आणि अपुरी झोप यामुळे हृदयविकाराच्या झटक्याचे प्रमाण झपाट्याने वाढत आहे. अनेक वेळा कोणतीही पूर्वसूचना न देता हार्ट अटॅक येतो, मात्र काही लक्षणांकडे वेळेत लक्ष दिल्यास मोठा धोका टाळता येऊ शकतो. त्यामुळे शरीर देत असलेल्या संकेतांकडे दुर्लक्ष करणे अत्यंत धोकादायक ठरू शकते. (Heart Attack Symptoms)
तज्ज्ञांच्या मते, अनेकदा धमन्यांमध्ये मोठ्या प्रमाणावर ब्लॉकेज असूनही सुरुवातीला स्पष्ट लक्षणे दिसत नाहीत. त्यामुळे आपण पूर्णपणे तंदुरुस्त आहोत असा गैरसमज करून घेणे चुकीचे ठरू शकते. किरकोळ वाटणाऱ्या तक्रारीदेखील भविष्यात गंभीर स्वरूप घेऊ शकतात, म्हणून वेळीच तपासणी करून घेणे आवश्यक आहे.
हार्ट अटॅक येण्यापूर्वी दिसणारी महत्त्वाची लक्षणं :
हृदयविकाराचा झटका येण्याआधी अनेकांना छातीत जडपणा, दडपण किंवा जळजळ जाणवते. ही वेदना केवळ छातीपुरती मर्यादित न राहता जबड्यापासून नाभीपर्यंत पसरू शकते. उजव्या किंवा डाव्या हातात, खांद्यात, पाठीत किंवा मानेत दुखणे जाणवणे हे देखील धोक्याचे संकेत मानले जातात. (Heart Attack Symptoms)
यासोबतच अचानक घाम येणे, श्वास घेण्यास त्रास होणे, मळमळ, चक्कर येणे, अस्वस्थता किंवा थकवा जाणवणे अशी लक्षणेही दिसू शकतात. काही वेळा ही लक्षणे सौम्य असतात, त्यामुळे लोक त्याकडे दुर्लक्ष करतात, पण हेच दुर्लक्ष जीवघेणे ठरू शकते.
Heart Attack | लक्षणे दिसताच काय करावे? :
अशा कोणत्याही लक्षणांचा अनुभव आल्यास वेळ न दवडता तात्काळ डॉक्टरांचा सल्ला घ्यावा किंवा जवळच्या रुग्णालयात दाखल व्हावे. स्वतः औषधे घेणे किंवा वेदना आपोआप कमी होतील असा अंदाज बांधणे धोकादायक ठरू शकते. वेळीच उपचार मिळाल्यास जीव वाचण्याची शक्यता मोठ्या प्रमाणात वाढते.
दरम्यान, नियमित व्यायाम, संतुलित आहार, धूम्रपान व मद्यपान टाळणे, पुरेशी झोप आणि तणाव नियंत्रण यामुळे हृदयविकाराचा धोका कमी करता येतो. आरोग्य तपासणी नियमितपणे करून घेणेही तितकेच महत्त्वाचे आहे.
