Gold Price | सोने (Gold) आणि चांदी (Silver) खरेदीचा विचार करणाऱ्यांसाठी दिलासादायक बातमी समोर आली आहे. सलग दुसऱ्या दिवशी दोन्ही मौल्यवान धातूंच्या किमतींमध्ये मोठी घसरण झाली आहे. मल्टी कमोडिटी एक्सचेंज (MCX) वरील व्यवहाराच्या सुरुवातीलाच चांदीच्या दरात पाच हजार रुपयांपेक्षा अधिक घट नोंदवली गेली, तर सोन्याच्याही वायदा दरात मोठी घसरण झाली आहे.
MCX वर चांदीच्या किमतीत मोठी घसरण :
मंगळवारी मल्टी कमोडिटी एक्सचेंज (MCX) वर व्यवहार सुरू होताच 4 सप्टेंबर मुदतपूर्ती (Expiry) असलेल्या चांदीच्या वायदा कराराच्या दरात मोठी घसरण दिसून आली. चांदीचा भाव थेट 2,30,803 रुपये प्रति किलोपर्यंत खाली आला. याआधीच्या व्यवहारात हा दर 2,36,099 रुपये प्रति किलोवर बंद झाला होता. म्हणजेच, एका दिवसातच प्रति किलो 5,296 रुपयांची घसरण झाली आहे. त्यामुळे सलग दुसऱ्या दिवशी चांदी स्वस्त झाल्याचे चित्र दिसत आहे.
या आठवड्याच्या सुरुवातीपासूनच चांदीच्या किमतींमध्ये घसरण सुरू झाली आहे. गेल्या शुक्रवारी चांदीचा वायदा दर 2,37,410 रुपये प्रति किलोवर बंद झाला होता. त्यानंतरच्या अवघ्या दोन व्यवहारांमध्ये चांदीच्या दरात एकूण 6,607 रुपयांची घट झाली आहे. यामुळे सध्याचा भाव हा चांदीच्या 4.20 लाख रुपये प्रति किलो या सर्वकालीन उच्चांकाच्या तुलनेत जवळपास निम्म्यावर आला आहे. 31 डिसेंबर 2025 रोजी चांदीचा वायदा दर 2,54,082 रुपये प्रति किलो होता. त्यानंतर जानेवारी महिन्यात किमतींनी 4 लाख रुपयांचा ऐतिहासिक टप्पा पार केला होता. मात्र त्यानंतर सुरू झालेल्या घसरणीमुळे सध्याचा दर वर्षअखेरीच्या पातळीपेक्षाही 23,279 रुपयांनी कमी झाला आहे.
Gold Price | सोन्याच्या दरातही मोठी घट :
चांदीप्रमाणेच सोन्याच्या वायदा दरातही मंगळवारी मोठी घसरण नोंदवण्यात आली. मल्टी कमोडिटी एक्सचेंज (MCX) वर मागील सत्रात 24 कॅरेट सोन्याचा प्रति 10 ग्रॅम वायदा दर 1,46,917 रुपये होता. मात्र नवीन व्यवहार सुरू होताच तो घसरून 1,45,351 रुपयांवर पोहोचला. त्यामुळे एका दिवसात प्रति 10 ग्रॅम सोन्याच्या किमतीत 1,566 रुपयांची घट झाली आहे.
सलग दुसऱ्या दिवशी सोने आणि चांदी दोन्ही धातूंच्या किमती कमी झाल्यामुळे दागिने खरेदी करणारे ग्राहक आणि गुंतवणूकदार यांच्यासाठी ही सकारात्मक घडामोड मानली जात आहे. मात्र, सोने, चांदी किंवा गोल्ड-सिल्व्हर ईटीएफ (Gold-Silver ETF) मध्ये गुंतवणूक करण्यापूर्वी संबंधित क्षेत्रातील तज्ज्ञांचा सल्ला घेणे आवश्यक असल्याचेही सांगितले जात आहे.
