El Nino Maharashtra | राज्यात मान्सूनचे आगमन झाले असले तरी अपेक्षित पावसाची अद्याप जोरदार सुरुवात झालेली नाही. त्यातच हवामान विभागाने अल निनोच्या प्रभावामुळे यंदाच्या मान्सूनवर परिणाम होण्याची शक्यता व्यक्त केली आहे. विशेषतः विदर्भातील काही भागांमध्ये पावसाऐवजी उष्णतेची तीव्रता वाढणार असल्याचा इशारा देण्यात आला आहे. त्यामुळे पुढील काही दिवस नागरिकांनी विशेष काळजी घेण्याचे आवाहन करण्यात आले आहे.
नागपूर प्रादेशिक हवामान केंद्राचे शास्त्रज्ञ डॉ. प्रवीण कुमार यांनी दिलेल्या माहितीनुसार, सध्या अल निनोची प्रक्रिया सक्रिय झाली असून ती अद्याप कमकुवत अवस्थेत आहे. मात्र मान्सून पुढे सरकत असताना त्याचा प्रभाव अधिक वाढण्याची शक्यता आहे. विशेषतः सप्टेंबर महिन्यात अल निनो अधिक प्रभावी ठरू शकतो, ज्यामुळे पावसाचे प्रमाण कमी होण्याचा अंदाज वर्तवण्यात आला आहे.
पावसावर दुहेरी परिणाम :
हवामान तज्ज्ञांच्या मते, अल निनोसोबतच इंडियन ओशन डायपोल (IOD) चा प्रभावही सध्या दिसून येत आहे. या दोन्ही हवामान घटकांचा एकत्रित परिणाम मान्सूनवर होत असून राज्यासह विदर्भात पावसाची शक्यता कमी होत आहे. यंदा संपूर्ण हंगामात सरासरीच्या सुमारे 94 टक्के पाऊस होण्याचा अंदाज व्यक्त करण्यात आला आहे.
अल निनो ही प्रक्रिया दक्षिण अमेरिकेजवळील प्रशांत महासागराच्या पृष्ठभागावरील तापमान वाढल्यामुळे निर्माण होते. या बदलाचा परिणाम जगभरातील हवामानावर होत असून भारतातील मान्सूनही त्याला अपवाद नाही. मागील अनेक वर्षांच्या आकडेवारीत अल निनो सक्रिय असताना पावसाचे प्रमाण घटल्याचे स्पष्ट दिसून आले आहे.
El Nino Maharashtra | विदर्भातील चार जिल्ह्यांना उष्णतेचा इशारा :
सध्या विदर्भात मान्सून पोहोचण्यासाठी आवश्यक हवामान परिस्थिती तयार झालेली नसल्याचे हवामान विभागाने स्पष्ट केले आहे. पुढील चार ते पाच दिवस मान्सूनच्या प्रगतीसाठी अनुकूल परिस्थिती निर्माण होण्याची शक्यता कमी आहे. उलट या काळात तापमानात लक्षणीय वाढ होण्याचा अंदाज व्यक्त करण्यात आला आहे.
यामुळे अमरावती, वर्धा, अकोला आणि नागपूर या जिल्ह्यांसाठी हीटवेव्हचा इशारा जारी करण्यात आला आहे. या भागांमध्ये तापमान सामान्यपेक्षा चार ते पाच अंश सेल्सिअसने अधिक राहू शकते. गरम व कोरडे वारे वाहत असल्याने उष्णतेची तीव्रता आणखी वाढण्याची शक्यता आहे. त्यामुळे नागरिकांनी दुपारच्या वेळेत घराबाहेर पडणे टाळावे आणि आवश्यक ती खबरदारी घ्यावी, असे आवाहन हवामान विभागाकडून करण्यात आले आहे.
