Tanisha Bhise | पुण्यातील (Pune) दीनानाथ मंगेशकर रुग्णालयात (Dinanath Mangeshkar Hospital) गर्भवती तनिषा भिसे (Tanisha Bhise) यांना वेळेवर उपचार न मिळाल्याने त्यांचा मृत्यू झाल्याच्या आरोपानंतर, आता राज्य सरकारने याच रुग्णालयाला दिलेल्या भूखंडावरून नवीन वाद निर्माण झाला आहे. रुग्णांकडून लाखो रुपये उपचारासाठी मागणाऱ्या ‘मग्रूर’ रुग्णालयाला केवळ १ रुपया वार्षिक भाड्याने कोट्यवधींची सरकारी जमीन देण्याची ‘खैरात’ सरकारने का केली?, असा संतप्त सवाल सामाजिक कार्यकर्ते विजय कुंभार (Vijay Kumbhar) आणि नागरिकांकडून विचारला जात आहे.

नाल्यावरील जागेचे १ रुपयात भाडेपट्टे

या वादाच्या केंद्रस्थानी आहे राज्य मंत्रिमंडळाने १८ फेब्रुवारी २०२५ रोजी घेतलेला एक निर्णय. या निर्णयानुसार, पुण्यातील कर्वेनगर (Karvenagar) येथील एका नाल्यावरील सुमारे ७९५ चौरस मीटर शासकीय जागा दीनानाथ मंगेशकर फाऊंडेशन हॉस्पिटल, मेडिकल रिसर्च सेंटरला (Deenanath Mangeshkar Foundation Hospital) वार्षिक केवळ १ रुपया या नाममात्र दराने भाडेपट्ट्याने देण्यास मंजुरी देण्यात आली. रुग्णालयाच्या ट्रस्टने नाल्याच्या दोन्ही बाजूला जागा खरेदी केली असून, त्या दोन्ही मिळकतींना जोडण्यासाठी नाल्यावर पूल बांधायचा आहे. त्यासाठी आवश्यक असलेली नाल्यावरील सरकारी जागा मिळावी, अशी मागणी ट्रस्टने केली होती, जी मान्य करण्यात आली.

या जमिनीचे सध्याचे बाजारमूल्य किमान १० कोटी रुपये असेल, असे विजय कुंभार यांचे म्हणणे आहे. त्यांनी असाही दावा केला आहे की, यापूर्वी रुग्णालयासाठी दिलेली मुख्य जागाही अशाच प्रकारे नाममात्र भाड्याने दिली गेली असावी. त्यामुळे, कोट्यवधींची सरकारी मालमत्ता एका खाजगी ट्रस्टला कवडीमोल भावात देण्याच्या सरकारच्या निर्णयावर आता प्रश्नचिन्ह निर्माण झाले आहे.

Tanisha Bhise | रुग्ण मृत्यूनंतर निर्णयावर प्रश्नचिन्ह

हा शासकीय जमीन देण्याचा निर्णय आणि तनिषा भिसे यांच्या मृत्यूची घटना यांचा संबंध जोडला जात आहे कारण दोन्ही ठिकाणी ‘पैशा’चा मुद्दा केंद्रस्थानी आहे. तनिषा भिसे यांच्या कुटुंबीयांनी आरोप केला आहे की, प्रसूतीसाठी रुग्णालयात आणले असता प्रशासनाने २० लाखांची मागणी केली, नंतर १० लाखांचे डिपॉझिट भरल्याशिवाय उपचार सुरू करण्यास नकार दिला. कुटुंबीय अडीच लाख भरायला तयार असतानाही त्यांना दाखल करून घेतले नाही. शेवटी दुसऱ्या रुग्णालयात नेताना तनिषा यांचा मृत्यू झाला, जरी त्यांनी जुळ्या मुलांना जन्म दिला होता.

या पार्श्वभूमीवर, विजय कुंभार यांनी सरकारवर सडकून टीका केली आहे. “फक्त पैशाची हाव असणाऱ्या मग्रूर हॉस्पिटलला नाममात्र दरात जमीन देण्याची गरज काय? रुग्णालयाने १० लाख रुपये आगाऊ भरले नाहीत म्हणून उपचार नाकारले आणि रुग्ण दगावला,” अशा शब्दांत त्यांनी संताप व्यक्त केला. ज्या रुग्णालयाला एका रुग्णाच्या जीवापेक्षा १० लाख रुपये मोठे वाटतात, त्याच रुग्णालयाला सरकारने १० कोटींची जमीन १ रुपयात का द्यावी? हा नैतिक प्रश्न आता विचारला जात आहे. आमदार अमित गोरखे (Amit Gorkhe) यांनी याप्रकरणी मुख्यमंत्र्यांकडे तक्रार केली असून, आता सरकार या जमीन वाटपाच्या निर्णयाचा फेरविचार करणार का, याकडे लक्ष लागले आहे.

News Title – Dinanath Hospital Land Grant Controversy Pune Tanisha Bhise