काँग्रेसला दिल्लीतील जनतेने नाकारलं, दिल्ली विधानसभा निवडणुकीत बसला सर्वात मोठा झटका

On: February 8, 2025 11:53 AM

Delhi elections 2025 Congress wiped out in Delhi AAP and BJP dominate

---Advertisement---

Delhi elections 2025 | सलग 15 वर्षे सत्ता उपभोगलेल्या काँग्रेससाठी दिल्ली विधानसभा निवडणूक 2025 हा मोठा धक्का ठरला आहे. कारण यंदा संपूर्ण निवडणुकीत काँग्रेसचा काहीच प्रभाव दिसून आलेला नाही. संपूर्ण लढत केवळ आम आदमी पार्टी (AAP) आणि भाजप (BJP) यांच्यातच मर्यादित राहिली आहे. (Delhi elections 2025)

काँग्रेसला एकही जागा नाही, मतशेअरमध्येही घसरण

सकाळी 10.30 वाजेपर्यंतच्या प्राथमिक कलांनुसार, काँग्रेस 70 पैकी एकाही जागेवर आघाडीवर दिसत नाही. मतांच्या टक्केवारीबाबतही काँग्रेस अत्यंत कमकुवत स्थितीत आहे. आतापर्यंतच्या आकडेवारीनुसार काँग्रेसला केवळ 6.86% मते मिळाली आहेत. सध्याच्या कलांमध्ये भाजप 41 जागांवर, तर आम आदमी पार्टी 28 जागांवर आघाडीवर आहे. जर काँग्रेसला पुन्हा एकही जागा मिळाली नाही, तर हा सलग तिसरा पराभव असेल, जिथे दिल्लीने काँग्रेसला पूर्णतः नाकारले आहे.

2020 मध्येही काँग्रेसचे खाते उघडले नव्हते

दिल्ली विधानसभेच्या 2020 मधील निवडणुकीतही काँग्रेसचे प्रदर्शन अत्यंत खराब राहिले. पक्षाला एकही जागा मिळाली नव्हती आणि मतशेअर केवळ 4.26% एवढा होता. 2015 मध्ये काँग्रेसने सर्व 70 जागांवर उमेदवार दिले होते, मात्र पक्षाला एकही जागा मिळाली नाही. त्या वेळी काँग्रेसच्या मतशेअरमध्ये 9.7% इतकी घसरण झाली होती.

आम आदमी पक्षाच्या उदयानंतर काँग्रेसला जोरदार धक्का

2013 मध्ये आम आदमी पक्षाच्या (AAP) उदयानंतर सर्वाधिक नुकसान काँग्रेसलाच सहन करावे लागले. 1998 पासून दिल्लीवर सलग सत्ता गाजवणाऱ्या काँग्रेसला 2013 मध्ये मोठा धक्का बसला. नव्या पक्षाने राजधानीत राजकीय चमत्कार घडवला आणि काँग्रेसला मोठी पीछेहाट करावी लागली. 2008 मध्ये 40% पेक्षा अधिक मतशेअर घेऊन सत्ता स्थापन करणाऱ्या काँग्रेसचा 2013 मध्ये मतशेअर केवळ 24.25% वर घसरला आणि जागा 43 वरून थेट 8 वर आल्या. त्यानंतर काँग्रेससाठी दिल्ली विधानसभेत एकही जागा जिंकणे कठीण झाले आहे. (Delhi elections 2025)

लोकसभा निवडणुकीचा प्रभाव विधानसभा निवडणुकीत दिसला नाही

देशभरात काँग्रेसने लोकसभा निवडणुकीत चांगली कामगिरी केली होती. काँग्रेसने भाजपला अनेक ठिकाणी जोरदार टक्कर दिली होती. मात्र दिल्लीच्या सातही लोकसभा जागांवर काँग्रेसचा पराभव झाला. तरीही 18% मतदारांनी राहुल गांधी (Rahul Gandhi) यांच्या नेतृत्वाखालील काँग्रेसवर विश्वास ठेवला होता. मात्र, विधानसभा निवडणुकीत त्याचा कोणताही सकारात्मक प्रभाव दिसला नाही. (Delhi elections 2025)