CNG Price Hike in Pune | पुणेकरांना पुन्हा एकदा महागाईचा झटका बसला आहे. पेट्रोल आणि एलपीजी गॅसच्या दरांतील चढ-उतारानंतर आता सीएनजीच्या दरातही वाढ करण्यात आली आहे. या दरवाढीमुळे सार्वजनिक वाहतूक तसेच खाजगी वाहनधारकांच्या खर्चात वाढ होणार आहे. शहरात सीएनजीच्या दरात 2 रुपयांची वाढ करण्यात आली असून नवे दर मध्यरात्रीपासून लागू झाले आहेत.
या दरवाढीमुळे विशेषतः रिक्षाचालक, कॅब चालक आणि रोज सीएनजीवर चालणाऱ्या वाहनांचा वापर करणाऱ्या नागरिकांना आर्थिक फटका बसण्याची शक्यता आहे. गेल्या काही दिवसांपासून इंधन दरातील अस्थिरतेमुळे सामान्य नागरिकांचे बजेट आधीच बिघडले असताना आता सीएनजी महागल्याने चिंता वाढली आहे.
CNG चे नवे दर किती? :
दरवाढीनंतर पुणे आणि परिसरात सीएनजीसाठी ग्राहकांना आता अधिक पैसे मोजावे लागणार आहेत. यापूर्वी सीएनजीचा दर 92.50 रुपये प्रति किलो होता. मात्र आता 2 रुपयांनी वाढ होऊन नवा दर 94.50 रुपये प्रति किलो झाला आहे. ही वाढ मध्यरात्रीपासून लागू करण्यात आली आहे. (Fuel Price Increase Pune)
या दरवाढीचा थेट परिणाम सार्वजनिक वाहतुकीवर होण्याची शक्यता व्यक्त केली जात आहे. सीएनजी महागल्यामुळे रिक्षा संघटनांकडून भाडेवाढीची मागणी देखील पुढे येण्याची शक्यता आहे.
CNG Price Hike in Pune | दरवाढीमागचे कारण काय? :
सध्या आंतरराष्ट्रीय स्तरावर सुरू असलेल्या इराण-इस्रायल तणावाचा परिणाम जागतिक इंधन बाजारावर होत असल्याचे सांगितले जात आहे. या पार्श्वभूमीवर कच्च्या तेलाच्या किमती आणि गॅस पुरवठ्यावर दबाव निर्माण झाला आहे. त्यामुळे देशातील इंधन दरांवरही त्याचा परिणाम दिसून येत आहे. (Pune CNG Rate Hike)
दरम्यान, प्रीमियम इंधनाच्या दरातही वाढ झाली आहे. इंडियन ऑइल कॉर्पोरेशनने आपल्या प्रीमियम श्रेणीतील इंधनांच्या किमतीत बदल केला आहे. सर्वाधिक शुद्ध मानले जाणारे ‘XP100’ पेट्रोल आता प्रति लिटर 160 रुपयांपर्यंत पोहोचले आहे. तसेच ‘एक्स्ट्रा ग्रीन’ डिझेलच्या दरातही वाढ करण्यात आली असून प्रीमियम वाहनधारकांनाही याचा मोठा फटका बसणार आहे.
