August 1 Rule Changes | 1 ऑगस्टपासून देशभरात सर्वसामान्यांच्या दैनंदिन आयुष्याशी संबंधित अनेक महत्त्वाचे बदल लागू झाले आहेत. एलपीजी (LPG) सिलिंडरच्या किमतींपासून रेल्वे (Indian Railways) तत्काळ तिकीट बुकिंग, बँकिंग सेवा शुल्क, इलेक्ट्रॉनिक्स वस्तूंचे दर आणि विमान प्रवासाच्या खर्चापर्यंत अनेक नियमांमध्ये बदल करण्यात आले आहेत. या बदलांचा थेट परिणाम प्रत्येक कुटुंबाच्या मासिक बजेटवर होण्याची शक्यता आहे.
गॅस, रेल्वे आणि वस्तूंच्या किमतीत मोठे बदल :
प्रत्येक महिन्याच्या पहिल्या दिवशी तेल विपणन कंपन्या एलपीजी सिलिंडरच्या दरांचा फेर आढावा घेतात. जुलै महिन्यात 19 किलोच्या व्यावसायिक सिलिंडरच्या किमती कमी करण्यात आल्या होत्या, मात्र 14 किलोच्या घरगुती गॅस सिलिंडरच्या दरात कोणताही बदल झाला नव्हता. त्यामुळे ऑगस्टमध्ये घरगुती सिलिंडरच्या किमतीत दिलासा मिळणार की दरवाढ होणार, याकडे ग्राहकांचे लक्ष लागले आहे. या निर्णयाचा थेट परिणाम घरगुती स्वयंपाकाच्या खर्चावर होणार आहे.
रेल्वेने तत्काळ तिकीट बुकिंग प्रक्रियेतही महत्त्वाचा बदल लागू केला आहे. प्रवाशांना अधिक सोयीस्कर सेवा देण्यासाठी आता टोकन वाटपाची वेळ आणि तिकीट बुकिंगची वेळ एकसमान करण्यात आली आहे. त्यामुळे प्रवाशांना दोन वेळा रांगेत उभे राहण्याची गरज राहणार नाही आणि तिकीट आरक्षणाची प्रक्रिया अधिक वेगाने पूर्ण होणार आहे.
दरम्यान, सणासुदीचा हंगाम लक्षात घेता चहापत्ती, साबण, हेअर ऑईल यांसारख्या एफएमसीजी (FMCG) वस्तूंच्या किमती 6 ते 8 टक्क्यांनी वाढण्याची शक्यता आहे. तसेच टीव्ही, फ्रिज, वॉशिंग मशीन यांसारख्या इलेक्ट्रॉनिक्स वस्तूंच्या किंमती 4 ते 6 टक्क्यांनी वाढू शकतात. मेमरी चिप महागल्यामुळे स्मार्टफोनचे दरही वाढण्याची शक्यता व्यक्त करण्यात आली असून उत्पादन खर्च वाढल्याने वाहन उत्पादक कंपन्यांकडूनही दरवाढ होण्याची शक्यता आहे.
August 1 Rule Changes | बँक शुल्क आणि विमान प्रवासावरही परिणाम :
1 ऑगस्टपासून काही बँकांनी आपल्या विविध सेवांच्या शुल्कामध्ये बदल केले आहेत. उज्जीवन स्मॉल फायनान्स बँक (Ujjivan Small Finance Bank) आता एसएमएस अलर्टसाठी प्रति संदेश 30 पैसे, मासिक मर्यादेच्या अधीन राहून, आकारणार आहे. याशिवाय डेबिट कार्ड देखभाल शुल्क, खाते व्यवस्थापन शुल्क आणि इतर काही बँकिंग सेवांच्या शुल्कातही बदल करण्यात आले आहेत. त्यामुळे ग्राहकांनी आपल्या बँकेकडून मिळणाऱ्या सूचना आणि अद्ययावत शुल्काची माहिती वेळोवेळी तपासणे आवश्यक आहे.
दरम्यान, विमान इंधन अर्थात एटीएफ (Air Turbine Fuel – ATF) च्या दरातही प्रत्येक महिन्याच्या सुरुवातीला बदल केला जातो. एटीएफचे दर कमी झाल्यास विमान कंपन्यांचा खर्च घटू शकतो आणि हवाई तिकिटांचे दरही कमी होण्याची शक्यता असते. मात्र इंधन महागल्यास विमान प्रवासाचा खर्च वाढू शकतो. त्यामुळे विमानाने प्रवास करण्याचा विचार करणाऱ्या प्रवाशांनी तिकीट आरक्षित करण्यापूर्वी नवीन दरांची माहिती तपासणे फायदेशीर ठरेल. या सर्व बदलांचा थेट परिणाम सर्वसामान्यांच्या मासिक खर्चावर होणार असल्याने एलपीजीचे नवे दर, रेल्वेचे नियम, बँक शुल्क आणि आवश्यक वस्तूंच्या किमतींबाबत नियमित माहिती घेणे महत्त्वाचे ठरणार आहे.
