Ajit Pawar | राज्यात आगामी स्थानिक स्वराज्य संस्थांच्या निवडणुका जसजशा जवळ येत आहेत, तसतशा राजकीय वर्तुळात घडामोडींना वेग आला आहे. महाविकास आघाडीला एका पाठोपाठ एक धक्के बसत असून, अनेक प्रमुख नेते आणि कार्यकर्ते महायुतीमध्ये प्रवेश करत आहेत. या इनकमिंगचा सर्वात मोठा फायदा सध्या शिवसेना (शिंदे गट), भाजप आणि राष्ट्रवादी (अजित पवार गट) यांना होत आहे. यामध्ये आता राष्ट्रवादीच्या अजित पवार गटाने काँग्रेसला मोठा धक्का दिला आहे.
काँग्रेसच्या प्रदेश उपाध्यक्ष प्रतिभा शिंदे यांनी आपल्या पदाचा राजीनामा दिल्यानंतर त्या आता राष्ट्रवादी (अजित पवार गट) मध्ये प्रवेश करणार असल्याची माहिती समोर आली आहे. यामुळे काँग्रेसच्या गोटात मोठी खळबळ उडाली आहे. प्रतिभा शिंदे यांनी जाहीर केले आहे की, त्या एकट्या नसून, त्यांच्यासोबत २० ते २५ हजार कार्यकर्तेही अजित पवार गटात प्रवेश करणार आहेत. हा काँग्रेससाठी एक मोठा राजकीय धक्का मानला जात आहे.
या पक्षप्रवेशाच्या निर्णयामागचे कारण सांगताना प्रतिभा शिंदे म्हणाल्या की, ज्या आशा आणि अपेक्षा घेऊन त्या काँग्रेसमध्ये गेल्या होत्या, त्याला अपेक्षित असा सकारात्मक प्रतिसाद मिळाला नाही. जळगाव जिल्ह्यामध्ये त्यांना बैठकांना बोलावले जात नव्हते आणि पद असूनही काम करण्याची संधी दिली जात नव्हती, अशी त्यांची राज्य पातळीवर नाराजी होती. त्यांनी राहुल गांधी यांचे आभार मानले, कारण त्यांनी त्यांना पक्षात घेऊन पद दिले होते. मात्र, प्रत्यक्षात काम करण्याची संधी मिळाली नाही.
प्रतिभा शिंदे यांनी घोषणा केली आहे की, येत्या १७ ऑगस्ट रोजी जळगाव शहरातील शिवतीर्थ मैदानावर उपमुख्यमंत्री अजित पवार यांच्या उपस्थितीत त्या २० हजारांहून अधिक कार्यकर्त्यांसह राष्ट्रवादीत प्रवेश करणार आहेत. यावेळी काम करण्यासाठी पदाची आवश्यकता असते आणि अजितदादांनी त्यांना योग्य पद देण्याचे आश्वासन दिले असल्याचेही त्यांनी सांगितले.
काँग्रेसमधून इतक्या मोठ्या संख्येने कार्यकर्ते आणि एका प्रमुख नेत्याने पक्षांतर करणे हा आगामी निवडणुकांपूर्वी काँग्रेससाठी निश्चितच चिंतेचा विषय आहे. अजित पवार यांच्या नेतृत्वाखालील राष्ट्रवादीची ताकद यामुळे जळगाव जिल्ह्यासह राज्यात आणखी वाढणार आहे. आगामी काळात काँग्रेसला अशा प्रकारची गळती रोखण्यासाठी मोठी कसरत करावी लागेल, असे दिसते.
English Title: Big News! Ajit Dada Turns the Tables in the State
