‘हिट अँड रन’ च्या घटनेने मुंबई हादरली; गाडीखाली चिरडून महिलेचा मृत्यू, चालक फरार

On: July 7, 2024 10:29 AM

---Advertisement---

Worli Hit And Run Accident | पुण्यात काही दिवसांपुर्वी कल्याणीनगर भागात एका अल्पवयीन बिल्डर पुत्राने भरधाव कारने दोघांना उडवलं होतं. यामध्ये तरुण आणि तरुणीचा जागीच मृत्यू झाला होता. हे प्रकरण तेव्हा खूप गाजलं. त्यानंतरही अशा हिट अँड रनच्या घटना बऱ्याच ठिकाणी घडल्या. त्यामुळे आता रस्त्यावर चालताना नागरिकांना जीव मुठीत धरूनच चालण्याची स्थिती निर्माण झाली आहे.

अशात मुंबईत आज पहाटेच एक भीषण अपघात घडला. या प्रकारामुळे मुंबई हादरून गेली आहे. भल्या पहाटेच भरधाव कारमुळे मुंबईत एका महिलेला प्राण गमवावा लागला. वरळीमध्ये हिट अँड रनची घटना घडली आहे.

वरळी येथे हिट अँड रनचा प्रकार

मच्छी आणण्याठी गेलेल्या कोळी दांपत्याला पहाटे साडे पाच वाजता चार चाकीने फरफटत नेल्याची माहिती समोर आली आहे. वरळीतील ॲट्रीया मॉलजवळ ही घटना घडली आहे. वरळी (Worli Hit And Run Accident)कोळीवाडा परिसरात राहणारे नाकवा दांपत्य हे सकाळी ससून डॉकला मच्छी आणण्यासाठी गेले होते. मच्छी घेऊन परतत असताना एका चारचाकीने त्यांच्या दुचाकीला मागून धडक दिली.

कोळी दांपत्य दुचाकीवर मोठ्याप्रमाणात मच्छी वाहून नेत असल्याने त्यांच्या दुचाकीचे नियंत्रण सुटले आणि दोघंही चार चाकीच्या बोनटवर जाऊन पडले. त्यावेळी वेळीच नवऱ्याने कारच्या बोनटवरून बाजूला उडी टाकली. पण, महिलेला तेथून बाजूला होता आलं नाही. याचवेळी
घाबरलेल्या चालकाने कार न थांबवता सुसाट पळवली आणि त्यात कोळी महिला फरफटत गेली.

महिलेला नेले फरफटत

यानंतर महिलेला उपचारासाठी नायर रुग्णालयात (Worli Hit And Run Accident) नेले असता डॉक्टरांनी तिला मृत घोषित केले. कार चालकाने कार थांबवली असती तर, कदाचित महिलेचा जीव वाचला असता, असं म्हटलं जातंय.

अपघात झाल्यानंतर गाडीसह चालक फरार झाला आहे. पोलिसांकडून त्याचा कसून शोध सुरू आहे. पुण्यानंतर जळगाव, बुलढाणा आणि राज्यातील इतर शहरात असे प्रकार घडले आहे. यातून राज्यात हिट अँड रनच्या घटना कमी होण्याऐवजी वाढतच चालल्याचं चित्र समोर येत आहे.