Silver Rate | भारतात सोने-चांदी हे केवळ मौल्यवान धातू नसून गुंतवणूक आणि परंपरेचा महत्त्वाचा भाग मानले जातात. सण-समारंभ, लग्नसराई आणि गुंतवणूक पोर्टफोलिओमध्ये चांदीला विशेष स्थान आहे. सध्या चांदीच्या दरात मोठी चढ-उतार सुरू असून, येत्या काळात किंमत 4 लाखांच्या पुढे जाऊ शकते, अशी चर्चा बाजारात रंगली आहे.
22 फेब्रुवारी 2026 रोजी जागतिक संकेत, डॉलरमधील हालचाल आणि देशांतर्गत मागणी यांचा चांदीच्या भावावर परिणाम दिसून आला. गेल्या दोन महिन्यांत चांदीच्या दरात मोठे चढ-उतार झाले. एका टप्प्यावर दर प्रति किलो 4 लाखांच्या पुढे गेले होते, तर फेब्रुवारीमध्ये त्यात तीव्र घसरणही पाहायला मिळाली. (Today Silver Rate)
सध्याचा दर आणि वायदे बाजारातील संकेत :
‘गुड रिटर्न्स’च्या अहवालानुसार दुपारी 12.45 वाजेपर्यंत भारतात चांदीचा दर 275 रुपये प्रति ग्रॅम आणि 2,75,000 रुपये प्रति किलो नोंदवण्यात आला. शनिवारीदेखील दरात वाढ झाली आणि भाव स्थिर राहिले. शहरानुसार कर आणि स्थानिक मागणीमुळे दरात किंचित फरक आढळतो. चेन्नईसारख्या शहरांत चांदी नेहमीच तुलनेने महाग विकली जाते.
वायदे बाजारातही तेजीचा कल दिसून येतो. मल्टी कमोडिटी एक्स्चेंज म्हणजेच Multi Commodity Exchange of India (MCX) वर मार्च डिलिव्हरीसाठी चांदी 4.41 टक्क्यांनी वाढून 2,52,042 रुपये प्रति किलोवर बंद झाली. यावरून गुंतवणूकदारांचा सकारात्मक दृष्टिकोन स्पष्ट होतो.
Silver Rate | जागतिक घडामोडींचा प्रभाव :
23 ते 27 तारखेच्या आठवड्यात सोन्या-चांदीत आणखी चढ-उतार होण्याची शक्यता व्यक्त केली जात आहे. अमेरिकेच्या सर्वोच्च न्यायालयाने Donald Trump यांच्या शुल्क धोरणावर निर्णय दिल्यानंतर अतिरिक्त 10 टक्के आणि त्यानंतर 15 टक्के शुल्क लागू करण्याच्या घोषणेमुळे बाजारात अनिश्चितता वाढली आहे. अमेरिकन शेअर बाजारातील हालचाल आणि ट्रेझरी यील्डमधील वाढ याचाही परिणाम गुंतवणूकदारांच्या भावनांवर झाला आहे.
याशिवाय अमेरिका-इराण तणावामुळे सुरक्षित गुंतवणुकीच्या पर्यायांकडे वळण्याची प्रवृत्ती वाढू शकते. अशा परिस्थितीत चांदीसारख्या धातूंना मागणी वाढण्याची शक्यता तज्ज्ञ व्यक्त करत आहेत.
4.20 लाखांचे लक्ष्य शक्य? :
ऑगमॉन्टमधील संशोधन प्रमुख रेनिशा चैनानी यांच्या मते औद्योगिक मागणी आणि पुरवठ्यातील तुटवडा यामुळे चांदी दीर्घकालीन गुंतवणुकीसाठी आकर्षक ठरू शकते. आंतरराष्ट्रीय बाजारात दर 120 ते 130 डॉलरपर्यंत जाऊ शकतो. भारतीय बाजारात चांदीचे पुढील लक्ष्य 3,90,000 ते 4,20,000 रुपये प्रति किलो असू शकते, असा अंदाज व्यक्त केला जात आहे.
अल्पकालीन काळात दरात सुधारणा किंवा घसरण होण्याची शक्यता नाकारता येत नाही. त्यामुळे गुंतवणूक करण्यापूर्वी बाजाराचा ट्रेंड, जागतिक परिस्थिती आणि स्वतःची जोखीम क्षमता समजून घेणे आवश्यक आहे.
