Shivsena Leader Daughter Death | पंजाबमधील जालंधर (Jalandhar) शहरातून एक अत्यंत हृदयद्रावक घटना समोर आली आहे. शिवसेना (Shiv Sena) नेते दीपक कंबोज (Deepak Kamboj) यांच्या २२ वर्षीय कन्येचा, मुनमुन चितवान (Munmun Chitwan) हिचा तिच्या वाढदिवसाच्या दिवशीच दुर्दैवी अंत झाला. घरातील आनंदोत्सवाचे रूपांतर काही क्षणातच तीव्र शोकाकुल वातावरणात झाले असून, या घटनेमुळे संपूर्ण परिसरात हळहळ व्यक्त केली जात आहे.
बाथरूममध्ये गुदमरला श्वास
मुनमुन ही आपल्या वाढदिवसानिमित्त तयार होण्यासाठी बाथरूममध्ये स्नानासाठी गेली होती. मात्र, तिथे असलेल्या गीझरमधून (Geyser) अचानक गॅसची गळती सुरू झाली. काही वेळातच संपूर्ण बाथरूममध्ये विषारी धूर पसरला आणि तिला श्वास घेणे कठीण झाले. परिस्थिती इतकी गंभीर होती की, तिला दरवाजा उघडून बाहेर पडण्याची संधीही मिळाली नाही आणि ती तिथेच बेशुद्ध होऊन पडली.
बाथरूम पूर्णपणे बंद असल्याने वायुविजनासाठी जागा नव्हती, ज्यामुळे ऑक्सिजनची पातळी खालावली. गॅसचा प्रभाव इतका प्रचंड होता की, तो बाथरूमच्या फटींमधून बाहेरच्या खोलीतही जाणवू लागला होता. मुनमुन बराच वेळ बाहेर न आल्याने आणि गॅसचा वास पसरल्याने घरात असलेल्या व्यक्तींच्या मनात शंकेची पाल चुकचुकली.
Shivsena Leader Daughter Death | दरवाजा तोडून काढले बाहेर
कुटुंबीयांनी मुनमुनला खुपवेळा आवाज दिला, पण आतून कोणताही प्रतिसाद मिळाला नाही. घाबरलेल्या नातेवाईकांनी अखेर बाथरूमचा दरवाजा तोडून आत प्रवेश केला, तेव्हा ती निपचित पडलेली आढळली. तिला तातडीने जवळच्या रुग्णालयात हलवण्यात आले, मात्र तपासणीअंती वैद्यकीय अधिकाऱ्यांनी तिला मृत घोषित केले. वाढदिवसाच्या सेलिब्रेशनसाठी जमलेल्या पाहुण्यांवर या बातमीने दु:खाचा डोंगर कोसळला.
घटनेची माहिती मिळताच स्थानिक पोलिसांनी तातडीने घटनास्थळ गाठून पंचनामा केला. मृत्यूचे नेमके तांत्रिक कारण स्पष्ट व्हावे यासाठी मृतदेह शवविच्छेदनासाठी पाठवण्यात आला असून, त्यानंतरच तिच्यावर अंत्यसंस्कार पार पडले. दीपक कंबोज यांनी आपल्या भावना व्यक्त करताना सांगितले की, मुलीच्या उज्ज्वल भविष्यासाठी आणि वाढदिवसासाठी त्यांनी मोठी तयारी केली होती, पण नियतीने घात केला.
