RPI Leader Attack | नवी मुंबई महानगरपालिकेच्या निवडणुका तोंडावर असतानाच शहरातून एक धक्कादायक आणि खळबळजनक घटना समोर आली आहे. रिपब्लिकन पार्टी ऑफ इंडिया (RPI) चे नवी मुंबई जिल्हा सचिव बुद्धप्रकाश दिलपाक यांच्यावर भरदिवसा कोयत्याने जीवघेणा हल्ला करण्यात आला. या घटनेमुळे संपूर्ण नवी मुंबईत तणावाचे वातावरण निर्माण झाले असून, राजकीय वर्तुळासह नागरिकांमध्ये तीव्र संताप व्यक्त केला जात आहे.
या हल्ल्यात बुद्धप्रकाश दिलपाक गंभीर जखमी झाले असून, त्यांना तातडीने रुग्णालयात दाखल करण्यात आले आहे. सध्या त्यांची प्रकृती स्थिर असल्याची माहिती समोर येत आहे. या घटनेचा थरारक सीसीटीव्ही व्हिडीओ सोशल मीडियावर व्हायरल झाला असून, हल्ल्याची तीव्रता पाहून नागरिक हादरले आहेत.
हल्ला पूर्वनियोजित होता का? राजकीय वैराचा संशय :
मिळालेल्या प्राथमिक माहितीनुसार, हा हल्ला पूर्वनियोजित कटाचा भाग असावा, असा संशय व्यक्त केला जात आहे. निवडणुकीच्या पार्श्वभूमीवर राजकीय वातावरण तापलेले असताना, एका प्रमुख राजकीय कार्यकर्त्यावर असा हल्ला होणे गंभीर बाब मानली जात आहे. या प्रकरणामागे राजकीय वैर होते का, याचा सखोल तपास सुरू असल्याची माहिती पोलिसांनी दिली आहे.
या घटनेनंतर आंबेडकरी समाजात प्रचंड संतापाची लाट उसळली असून, हल्लेखोरांसह या हल्ल्यामागील सूत्रधारालाही तात्काळ अटक करण्याची मागणी जोर धरू लागली आहे. विविध संघटना आणि कार्यकर्त्यांकडून निषेध व्यक्त केला जात असून, कायदा-सुव्यवस्थेवर प्रश्नचिन्ह उपस्थित केले जात आहे.
— Naresh Shende (@NareshShen87640) December 15, 2025
RPI Leader Attack | नवी मुंबईतील वाढती गुन्हेगारी चिंतेचा विषय :
दरम्यान, नवी मुंबईत गेल्या काही महिन्यांपासून गुन्हेगारी घटनांमध्ये लक्षणीय वाढ झाल्याचे चित्र आहे. चोऱ्या, घरफोड्या, चेन स्नॅचिंग आणि वाहन चोरीसारख्या घटनांमुळे नागरिकांमध्ये भीतीचे वातावरण निर्माण झाले आहे. अशा परिस्थितीत एका राजकीय नेत्यावर झालेला हा हल्ला म्हणजे शहरातील कायदा-सुव्यवस्थेची गंभीर स्थिती दर्शवणारा प्रकार असल्याचे बोलले जात आहे.
पोलिसांनी सीसीटीव्ही फुटेजच्या आधारे हल्लेखोरांचा शोध सुरू केला असून, लवकरच आरोपींना अटक करण्यात येईल, असा दावा करण्यात आला आहे. मात्र, निवडणुकीच्या तोंडावर घडलेल्या या घटनेमुळे राजकीय तापमान आणखी वाढण्याची शक्यता व्यक्त केली जात आहे.
