Maharashtra ZP Election Result | राज्यातील जिल्हा परिषद आणि पंचायत समिती निवडणुकांचे निकाल हळूहळू स्पष्ट होत असून, अनेक प्रस्थापित नेत्यांच्या कुटुंबीयांनी या निवडणुकीत मोठे यश मिळवले आहे. १२ जिल्हा परिषदा आणि १२५ पंचायत समित्यांच्या निकालांतून अनेक ठिकाणी राजकीय घराण्यांचे वर्चस्व पुन्हा एकदा अधोरेखित झाले आहे. पुणे, सोलापूर, रायगड आणि रत्नागिरी जिल्ह्यांत दिग्गज नेत्यांच्या नातेवाईकांनी बाजी मारली आहे.
या निवडणुकीत सत्ताधारी महायुती आणि विरोधी महाविकास आघाडी यांच्यात अनेक ठिकाणी अटीतटीची लढत झाली. मात्र, स्थानिक पातळीवर जनसंपर्क आणि कौटुंबिक राजकीय वारसा या घटकांनी अनेक उमेदवारांच्या विजयात निर्णायक भूमिका बजावल्याचे दिसून आले आहे. (Maharashtra ZP Election Result)
पुणे आणि सोलापूर जिल्ह्यात दिग्गजांच्या वारसांचा प्रभाव :
पुणे जिल्ह्यातील आंबेगाव मतदारसंघात माजी मंत्री दिलीप वळसे पाटील यांची प्रतिष्ठा पणाला लागली होती. पारगाव जरकवाडी गटातून त्यांचे पुतणे विवेक वळसे पाटील यांनी तिसऱ्या फेरीअखेर २,१३० मतांची आघाडी घेत विजय निश्चित केला. तर पुरंदर तालुक्यात माजी आमदार बापूसाहेब पठारे यांची कन्या रूपाली झेंडे यांनी राष्ट्रवादी काँग्रेसच्या तिकिटावर यश मिळवले. विशेष म्हणजे, पुरंदरमध्ये राष्ट्रवादीचे दोन्ही पंचायत समिती सदस्य विजयी झाल्याने तालुक्यावर पक्षाची पकड अधिक मजबूत झाली आहे. (Maharashtra ZP Election Result)
सोलापूर जिल्ह्यातील माढा तालुक्यात मानेगाव जिल्हा परिषद गटात माजी मंत्री तानाजी सावंत यांचे पुतणे आणि शिवाजीराव सावंत यांचे पुत्र पृथ्वीराज सावंत यांनी भाजपच्या तिकिटावर तब्बल ६,८०० मतांच्या विक्रमी फरकाने विजय मिळवला. तसेच, भाजप नेते राम सातपुते यांच्या पत्नी संस्कृती सातपुते यांनीही जिल्हा परिषद निवडणुकीत यशस्वी पदार्पण करत विजय संपादन केला.
Maharashtra ZP Election Result | कोकणात जाधव आणि गोगावले घराण्यांचा विजय :
रत्नागिरी जिल्ह्यातील गुहागर विधानसभा मतदारसंघातील असगोली जिल्हा परिषद गटातून आमदार भास्कर जाधव यांचे पुत्र विक्रांत जाधव यांनी पहिल्या फेरीपासूनच ५७१ मतांची आघाडी घेत विजय मिळवला. रायगड जिल्ह्यात आमदार भरत गोगावले यांचे चिरंजीव विकास गोगावले यांनी प्रतिस्पर्ध्याला पराभूत करत आपले राजकीय अस्तित्व सिद्ध केले.
एकूणच, या जिल्हा परिषद आणि पंचायत समिती निवडणुकांमधून राज्यातील राजकीय घराणी आणि त्यांच्या पुढील पिढीचा स्थानिक स्वराज्य संस्थांमधील प्रभाव पुन्हा एकदा अधोरेखित झाला असून, आगामी विधानसभा आणि लोकसभा निवडणुकांच्या दृष्टीने हे निकाल महत्त्वाचे मानले जात आहेत.
