Pune Crime | पुण्याच्या नांदेड सिटी (Nanded City) पोलीस ठाण्याच्या हद्दीत एक धक्कादायक घटना घडली आहे. एका तरुणाने आपल्या चुलत भावाला इमारतीच्या पाचव्या मजल्यावरून ढकलून दिले, यात त्या भावाचा जागीच मृत्यू झाला. कौटुंबिक वादातून पत्नीला शिवीगाळ केल्याच्या कारणावरून हे टोकाचे पाऊल उचलण्यात आले. पोलिसांनी आरोपी भावाला अटक केली असून, नांदेड सिटी पोलीस (Nanded City Police) पुढील तपास करत आहेत. (Pune Crime)

मृत आणि आरोपी भावाची माहिती

अमर देशमुख (Amar Deshmukh) असे हत्या झालेल्या तरुणाचे नाव आहे, तर राजू भुरेलाल देशमुख (Raju Bhurelal Deshmukh) असे आरोपीचे नाव आहे. आरोपी राजू आणि अमर हे चुलत भाऊ असून, मूळचे मध्य प्रदेशातील (Madhya Pradesh) बालाघाटचे (Balaghat) रहिवासी आहेत. ते कामासाठी पुण्यात आले होते.

पुण्यातील धायरी (Dhayari) परिसरातील एका सोनपापडी बनवण्याच्या कारखान्यात दोघेही काम करत होते. मात्र, गेल्या काही दिवसांपासून त्यांच्यात वाद सुरू होता.

भांडणानंतर टोकाचे पाऊल

आरोपी राजू कौटुंबिक कारणावरून अमरच्या पत्नीला शिवीगाळ करत होता. घटनेच्या दिवशीही राजूने असेच केले. यामुळे अमर आणि राजूमध्ये बाचाबाची झाली. वाद वाढल्यावर अमर राजूला मारण्यासाठी त्याच्या अंगावर धावून गेला, पण झटापटीत राजूने अमरला पाचव्या मजल्यावरून खाली ढकलून दिले. यात अमरचा जागीच मृत्यू झाला.

ही घटना धायरी (Dhayari) परिसरातील कपील अपार्टमेंटमध्ये (Kapil Apartment) घडली. घटनेची माहिती मिळताच नांदेड सिटी पोलिसांनी (Nanded City Police) घटनास्थळी धाव घेतली. पंचनामा केल्यानंतर पोलिसांनी आरोपी राजूला अटक केली. त्याच्यावर हत्येसह विविध कलमांन्वये गुन्हा दाखल करण्यात आला आहे. कौटुंबिक वादातून झालेल्या या घटनेमुळे परिसरात खळबळ उडाली आहे. पोलीस या घटनेचा अधिक तपास करत आहेत. (Pune Crime)

Title : Pune Crime Brother Pushes Brother from Fifth Floor