PM Awas Yojana | भारत वेगाने विकसित होणाऱ्या देशांच्या यादीत अव्वल स्थान राखत आहे. अर्थव्यवस्था जगातील चौथ्या क्रमांकावर पोहोचली असली तरी, देशात अजूनही लाखो नागरिक बेघर आहेत. या पार्श्वभूमीवर सर्वसामान्यांना स्वतःचं घर मिळावं म्हणून केंद्र व राज्य सरकारकडून अनेक योजना राबवल्या जातात. त्यापैकी सर्वात महत्त्वाकांक्षी योजना म्हणजे प्रधानमंत्री आवास योजना (PM Awas Yojana – Urban).
2016 पासून सुरू असलेल्या या योजनेने आतापर्यंत करोडो लोकांना दिलासा दिला आहे. किफायतशीर घराची संधी उपलब्ध करून देत मध्यमवर्गीय, आर्थिकदृष्ट्या कमजोर आणि कमी उत्पन्न गटातील कुटुंबांना स्वतःचं घर मिळवणं या योजनेमुळे शक्य होत आहे. या योजनेची वैशिष्ट्ये आणि नव्या तरतुदीमुळे घर घेण्याचे स्वप्न पाहणाऱ्या लाखो कुटुंबांना मोठी मदत मिळणार आहे.
पीएम आवास योजना शहरी 2.0 – काय आहे खास? :
पीएम आवास योजना शहरी (PMAY-U) दोन भागांत विभागली असून ग्रामीण आणि शहरी अशी स्वतंत्र रचना आहे. सध्या चर्चेत असलेली योजना म्हणजे पीएमएवाय – शहरी 2.0, ज्याला 2024 मध्ये मंजुरी मिळाली. या टप्प्यात पहिल्या घराच्या खरेदीवर खास व्याज अनुदानाची तरतूद करण्यात आली आहे.
या योजनेअंतर्गत 25 लाख रुपये किंवा त्यापेक्षा कमी किमतीच्या घरांवरच व्याज अनुदान लागू राहणार आहे. घर नसलेल्या, वार्षिक उत्पन्न 9 लाखांपेक्षा कमी असलेल्या आणि कमी उत्पन्न गटातील कुटुंबांना या योजनेचा सर्वाधिक फायदा मिळतो. विशेष म्हणजे, या योजनेत 8 लाखांपर्यंतच्या कर्जावर तब्बल 4% व्याज अनुदान देण्यात येणार आहे.
यामुळे कर्जदाराचा EMI मोठ्या प्रमाणात कमी होणार आहे. घर खरेदीची प्रक्रिया अधिक सुलभ आणि परवडणारी बनवण्याचा उद्देश या सुधारित योजनेमागे आहे.
PM Awas Yojana | किती मिळते अनुदान? किती वर्षांसाठी? जाणून घ्या फायदे :
पीएमएवाय शहरी 2.0 अंतर्गत लाभार्थ्यांना जे व्याज अनुदान दिलं जातं ते जास्तीत जास्त 1.80 लाख रुपये मिळू शकतं. ही अनुदानरक्कम एकाच वेळी न देता एकूण 5 हप्त्यांमध्ये लाभार्थ्यांच्या खात्यात जमा केली जाते.
कर्जाचा कालावधी 12 वर्षांपर्यंत असलेल्या कर्जांवर हे अनुदान उपलब्ध राहणार आहे. कर्जाची रक्कम अधिक असली तरी अनुदानाची मर्यादा 8 लाखांपर्यंतच्या कर्जावरच लागू आहे. त्यामुळे घर खरेदी करताना मिळणाऱ्या लाभाची नेमकी गणिते आधीच काढणे ग्राहकांसाठी फायदेशीर ठरणार आहे. (PM Awas Yojana)
सरकारने या योजनेंतर्गत 2.30 लाख कोटी रुपये इतकी प्रचंड तरतूद केली असून पुढील पाच वर्षांत एक कोटीहून अधिक लाभार्थ्यांना या योजनेचा फायदा दिला जाणार आहे. त्यामुळे येत्या काही वर्षांत शहरी भागात घरकुलांची संख्या वाढण्याची शक्यता वाढली आहे.
‘त्या’ कुटुंबाला मोठा दिलासा मिळणार :
दरम्यान, घर नसलेल्या कुटुंबांसाठी ही योजना मोठा दिलासा ठरणार आहे. वाढत्या घरांच्या किमती आणि महागाईच्या काळात सरकारकडून दिले जाणारे व्याज अनुदान सर्वसामान्यांसाठी आर्थिकदृष्ट्या फायदेशीर आहे. घर खरेदीसाठी लागणारी कर्जव्यवस्था सुलभ आणि परवडणारी करण्यावरच योजनेचा भर आहे.
पीएम आवास योजना शहरी 2.0 मुळे लाखो कुटुंबांचे पक्के घराचे स्वप्न साकार होणार असून यातून देशातील घरकुलांची तूटही मोठ्या प्रमाणात भरून निघेल, असा प्रशासनाचा दावा आहे.
