Petrol-Diesel Price | रशियाचे राष्ट्राध्यक्ष व्लादिमीर पुतीन यांचा दोन दिवसांचा भारत दौरा आजपासून सुरू होत असून या भेटीला जागतिक स्तरावर मोठे महत्त्व प्राप्त झाले आहे. या भेटीपूर्वीच रशियन लष्करी तळ भारताला वापरण्यासाठी मंजूर झाल्याची माहिती समोर आली आहे. त्याचबरोबर कच्च्या तेलाच्या किंमतीत झालेली घसरण आणि रशियाकडून मिळू शकणाऱ्या संभाव्य सवलतींमुळे पेट्रोल-डिझेलचे दर कमी होण्याची शक्यता पुन्हा एकदा चर्चेत आली आहे. (Petrol-Diesel Price)
सध्या आंतरराष्ट्रीय बाजारात कच्च्या तेलाच्या खरेदीत गुंतवणूकदारांनी मंदी आणली असून रशिया-युक्रेन युद्ध संपुष्टात येण्याची चर्चा वेग घेत आहे. अशा स्थितीत भारताने अलीकडेच रशियन कच्च्या तेलाची आयात कमी केली आहे, तरीही पुन्हा सवलतीच्या दरात आयात वाढण्याची शक्यता व्यक्त होत आहे. याचा फायदा थेट पेट्रोल-डिझेलच्या संभाव्य कपातीच्या रूपाने भारतीय ग्राहकांना मिळू शकतो. (Vladimir Putin India visit)
कच्च्या तेलाच्या किंमतीत घसरण; भारताला मिळू शकतो मोठा फायदा :
गेल्या दोन दिवसांपासून ब्रेंट क्रूड आणि WTI या दोन्ही आंतरराष्ट्रीय बेंचमार्कमध्ये घसरण नोंदवली गेली आहे. उपलब्ध माहितीनुसार, ब्रेंट क्रूडचा भाव 62.32 डॉलर प्रति बॅरल तर WTI 58.52 डॉलर प्रति बॅरलपर्यंत खाली आला आहे. या घसरणीचा मोठा फायदा भारतासारख्या मोठ्या खरेदीदार देशाला होऊ शकतो.
रशिया-युक्रेन शांतता चर्चेच्या शक्यतेमुळे बाजारातील अस्थिरता कमी होण्याचा अंदाज आहे. त्यामुळे कच्च्या तेलाच्या किंमतीत आणखी घसरण होत राहिल्यास देशातील इंधनदरात कपातीची शक्यता अधिक बळकट होईल. भारताला रशियाकडून अतिरिक्त सवलत मिळाली तर पेट्रोल-डिझेलचे दर कमी करण्यासाठी सरकारकडे आर्थिक मोकळीक उपलब्ध होऊ शकते.
Petrol-Diesel Price | डॉलरऐवजी पर्यायी चलनाचा वापर; भारतासाठी महत्त्वाचा निर्णय? :
भारत आणि रशिया यांच्यातील तेल व्यवहारात डॉलरऐवजी इतर चलनाचा वापर करण्यावर चर्चेला वेग आला आहे. सध्या रियाल आणि चीनच्या चलनाद्वारे पेमेंट होत असले तरी आणखी लवचिकता आणण्याचे प्रयत्न सुरू आहेत. डॉलर-रुपया विनिमय दरातील मोठ्या तफावतीमुळे भारतावर अतिरिक्त आर्थिक भार येत आहे.
अमेरिकेने रशियन तेल खरेदीबाबत भारतावर दबाव आणला असून अनेक व्यवहारांमध्ये अडथळे निर्माण झाले आहेत. त्यामुळे पर्यायी चलनांचा वापर भारताला अधिक स्थिरता देऊ शकतो. पुतीन यांच्या भेटीदरम्यान यासंबंधी महत्त्वाचा निर्णय होण्याची अपेक्षा वर्तवली जात आहे.
ट्रम्प सरकारचा टॅरिफ फटका; GDPवर परिणाम होण्याची शक्यता :
एप्रिल 2022 ते जून 2025 या कालावधीत भारताने रशियाकडून मोठ्या प्रमाणात कच्चे तेल खरेदी केले. यामुळे भारताची जवळपास 17 अब्ज डॉलरची बचत झाली. मात्र, याच खरेदीमुळे अमेरिकेचे राष्ट्राध्यक्ष डोनाल्ड ट्रम्प यांनी भारतावर 25% टॅरिफ लावले. (Petrol-Diesel Price)
या अतिरिक्त टॅरिफमुळे भारतीय निर्यातीला 37 अब्ज डॉलरपर्यंतचा फटका बसू शकतो, असे अंदाज व्यक्त केले जात आहेत. GDP वृद्धीदरात 1% घट होण्याचीही भीती आहे. या परिस्थितीत पुतीन यांच्या भेटीदरम्यान भारत-रशिया संबंध अधिक मजबूत करण्याबाबत महत्त्वाचे निर्णय घेतले जाऊ शकतात.
