Pankaja Munde | भाजप नेत्या पंकजा मुंडे यांच्या हेलिकॉप्टरमध्ये छत्रपती संभाजीनगर येथे तांत्रिक अडचण निर्माण झाल्याची घटना समोर आली आहे. लातूर जिल्हा परिषद निवडणुकीच्या प्रचारासाठी रवाना होण्याआधीच हा बिघाड लक्षात आल्याने मोठी दुर्घटना टळली. सुरक्षेच्या कारणास्तव उड्डाण रद्द करण्यात आले असून त्या आता दुसऱ्या हेलिकॉप्टरने कार्यक्रमांना उपस्थित राहणार आहेत. (Pankaja munde helicopter news)
उड्डाणाआधीच आढळला तांत्रिक दोष :
भाजप नेत्या पंकजा मुंडे (Pankaja Munde) या सध्या मराठवाड्यात जिल्हा परिषद निवडणुकीच्या प्रचार दौऱ्यावर आहेत. आज लातूर जिल्ह्यात विविध ठिकाणी त्यांच्या सभा आयोजित करण्यात आल्या होत्या. या सभांसाठी त्या छत्रपती संभाजीनगर येथील विमानतळावरून हेलिकॉप्टरने लातूरकडे जाणार होत्या. मात्र हेलिकॉप्टरने आकाशात झेपावण्यापूर्वीच वैमानिकाच्या लक्षात तांत्रिक बिघाड आला. (Latur election campaign)
तत्काळ सुरक्षेचा विचार करून उड्डाण रद्द करण्यात आले. यामुळे संभाव्य मोठा अपघात टळल्याचे सांगण्यात येत आहे. पंकजा मुंडे यांच्या कार्यालयाकडून मिळालेल्या माहितीनुसार, ही समस्या उड्डाणाच्या आधीच लक्षात आल्यामुळे प्रवास सुरू होण्याआधीच आवश्यक खबरदारी घेण्यात आली आणि कोणतीही जीवितहानी झाली नाही.
Pankaja Munde | कार्यक्रमांच्या वेळापत्रकात बदल, पर्यायी व्यवस्था :
या घटनेमुळे पंकजा मुंडे (Pankaja Munde) यांच्या लातूरमधील नियोजित सभांच्या वेळापत्रकात काही बदल करावे लागले. कार्यकर्ते आणि नागरिकांची गैरसोय होऊ नये यासाठी तातडीने दुसऱ्या हेलिकॉप्टरची व्यवस्था करण्यात आली आहे. त्या थोड्याच वेळात लातूरकडे रवाना होतील, अशी माहिती समोर आली आहे.
तांत्रिक अडचणीमुळे काहीसा विलंब झाला असला तरी पंकजा मुंडे या सर्व नियोजित सभांना उपस्थित राहणार असल्याचे त्यांच्या कार्यालयाकडून स्पष्ट करण्यात आले आहे. त्यांच्या सुरक्षिततेबाबत माहिती मिळताच समर्थकांनी सुटकेचा निश्वास टाकला असून, या घटनेनंतरही प्रचार दौरा नियोजनानुसार सुरू ठेवण्यात येणार आहे.
