Mumbai flyover project | मुंबई महानगर प्रदेशातील वाहतूककोंडी सतत वाढत असताना, नागरिकांसाठी एक महत्त्वाची आणि दिलासादायक बातमी समोर आली आहे. नवी मुंबई आंतरराष्ट्रीय विमानतळ (NMIA) येत्या 25 डिसेंबरपासून कार्यरत होणार असून, पहिल्या टप्प्यात देशांतर्गत उड्डाणांना सुरुवात केली जाईल. विमानतळ कार्यान्वित होताच मुंबई–नवी मुंबईदरम्यान वाहतुकीत मोठ्या प्रमाणात वाढ होण्याचा अंदाज व्यक्त करण्यात आला आहे.
इंडिगो आणि एअर इंडिया या दोन प्रमुख विमान कंपन्यांनी पहिल्या टप्प्यातील उड्डाणांची घोषणा केली आहे. इंडिगो दिल्ली, बंगळुरू, हैदराबाद, अहमदाबाद, लखनऊ, जयपूर, नागपूर, उत्तर गोवा, कोचीन आणि मंगळुरू अशा दहा शहरांसाठी थेट सेवा देणार आहे. तर एअर इंडिया 25 डिसेंबरपासून दिल्ली आणि बंगळुरू मार्गावर सेवा सुरू करणार असून, 1 जानेवारीपासून दोन्ही मार्गांवरील उड्डाणे दररोज उपलब्ध राहतील. सर्व तिकिटांचे बुकिंग ऑनलाइन आणि ऑफलाइन सुरु झाले आहे.
NMIA सुरू होताच वाहतूक वाढणार; नगरपालिका सज्ज :
विमानतळ सुरू झाल्यानंतर मुंबई महानगर प्रदेशातील नागरी वाहतूक मोठ्या प्रमाणात नवी मुंबईकडे वळण्याची शक्यता आहे. या पार्श्वभूमीवर ठाणे–बेलापूर मार्गाचा व्यापक पुनर्विकास करण्याची महापालिकेने तयारी सुरू केली आहे. या मार्गावर सध्या मोठ्या प्रमाणात वाहतूक ताण जाणवत असल्याने त्याचे आधुनिकीकरण अत्यावश्यक ठरले आहे.
याच अनुषंगाने एनएमएमसीने तीन महत्त्वाच्या ठिकाणी नवे उड्डाणपूल उभारण्याचा प्रस्ताव सादर केला आहे. वाढत्या वाहतुकीचा ताण कमी करण्यासाठी रबाळे जंक्शन, क्रिस्टल हाऊस–पावणे विभाग आणि BASF परिसर ते महापे येथील हुंडई शोरूमदरम्यान मोठ्या उड्डाणपूलांची उभारणी करण्यात येणार आहे.
Mumbai flyover project | तीन उड्डाणपूलांसाठी तब्बल 619 कोटींचा खर्च :
रबाळे जंक्शन उड्डाणपूलासाठी 171 कोटी रुपये खर्च अपेक्षित आहे, तर क्रिस्टल हाऊस–पावणे उड्डाणपूलासाठी 110 कोटी रुपये मंजूर करण्यात येणार आहेत. याशिवाय BASF परिसर ते महापे दरम्यानच्या मोठ्या उड्डाणपूलासाठी तब्बल 338 कोटी रुपयांचा खर्च अपेक्षित आहे. या तीनही प्रकल्पांसाठी एकूण खर्च सुमारे 619 कोटी रुपयांपर्यंत पोहोचणार आहे. (Mumbai flyover project)
याशिवाय ठाणे–बेलापूर (Thane Belapur redevelopment) मार्गाच्या पूर्ण पुनर्बांधणीसाठी स्वतंत्ररीत्या 227 कोटी रुपयांची तरतूद करण्यात आली आहे. सध्या तुर्भे रेल्वे स्थानकाजवळ वाहतूक कोंडी कमी करण्यासाठी एक स्वतंत्र उड्डाणपूल उभारण्याचे काम सुरू असून, याच्या पूर्णत्वानंतर परिसरातील वाहतूक मोठ्या प्रमाणात सुरळीत होण्याची शक्यता आहे.
उड्डाणपुलांमुळे प्रवाशांना मोठा दिलासा मिळणार :
या भागातील नागरिकांना नेहमीच वाहतुकीच्या समस्येचा प्रचंड सामना करावा लागतो. त्यामुळे नव्या उड्डाणपुलांमुळे प्रवाशांना मोठा दिलासा मिळेल, असा विश्वास अधिकाऱ्यांनी व्यक्त केला आहे. NMIA पूर्ण क्षमतेने कार्यान्वित झाल्यानंतर प्रवासी आणि मालवाहतूक दोन्ही वाढणार असल्याने ठाणे–बेलापूर मार्गाचे आधुनिकीकरण अत्यंत आवश्यक असल्याचेही सांगण्यात आले आहे. (Mumbai flyover project)
आगामी काही वर्षांत मार्गाचे व्यापक विस्तारीकरण, डांबरीकरण, मजबुतीकरण आणि सुसज्जीकरण पूर्ण होणार आहे. यामुळे हा परिसर केवळ वाहतुकीसाठीच नव्हे तर संपूर्ण क्षेत्राच्या विकासासाठी एक महत्त्वाचा टप्पा ठरणार आहे. NMIA मुळे नवी मुंबई परिसराला नवे विकासगतीमान लाभण्याची शक्यता वर्तवली जात आहे.
