ZP Election Result 2026 | राज्यातील 12 जिल्हा परिषदा आणि 125 पंचायत समिती निवडणुकांची मतमोजणी सुरू झाली असून सुरुवातीच्या निकालांनी राजकीय समीकरणांमध्ये मोठे बदल घडवून आणल्याचे चित्र आहे. ग्रामीण भागातील या निवडणुकांमध्ये तब्बल हजारो उमेदवार मैदानात उतरले होते. पहिल्या फेरीनंतर समोर आलेल्या कलांनुसार महायुती आणि विशेषतः अजित पवार (Ajit Pawar) यांच्या राष्ट्रवादी काँग्रेस पक्षाने जोरदार कामगिरी केल्याचे दिसत आहे.
मतमोजणीत पहिला कल, राजकीय चित्र स्पष्ट :
शनिवारी झालेल्या मतदानात 12 जिल्हा परिषदांच्या 731 आणि पंचायत समित्यांच्या 1,462 जागांसाठी मतदारांनी मतदानाचा हक्क बजावला होता. रायगड (Raigad), रत्नागिरी (Ratnagiri), सिंधुदुर्ग (Sindhudurg), पुणे (Pune), सातारा (Satara), सांगली (Sangli), कोल्हापूर (Kolhapur), सोलापूर (Solapur), छत्रपती संभाजीनगर (Chhatrapati Sambhajinagar), परभणी (Parbhani), धाराशिव (Dharashiv) आणि लातूर (Latur) या जिल्ह्यांचा यात समावेश आहे. एकूण 7,438 उमेदवार निवडणूक रिंगणात होते, त्यामुळे निकालांकडे संपूर्ण राज्याचे लक्ष लागले आहे.
मतमोजणीच्या पहिल्या टप्प्यात जिल्हा परिषदांच्या 731 पैकी सुमारे 200 जागांचा कल स्पष्ट झाला आहे. त्यानुसार भाजप (BJP) 70 जागांवर, शिवसेना शिंदे गट (Shiv Sena Shinde Group) 38 जागांवर, राष्ट्रवादी अजित पवार गट (NCP Ajit Pawar Group) 43 जागांवर, काँग्रेस (Congress) 21 जागांवर, शिवसेना ठाकरे गट (Shiv Sena Thackeray Group) 14 जागांवर, राष्ट्रवादी शरद पवार गट (NCP Sharad Pawar Group) 3 जागांवर, तर इतर पक्ष 11 जागांवर आघाडीवर आहेत. या आकडेवारीवरून महायुतीने सुरुवातीपासूनच निर्णायक आघाडी घेतल्याचे स्पष्ट होते.
ZP Election Result 2026 | कोकणात बिनविरोध विजयांचा पाऊस :
कोकण पट्ट्यात महायुतीच्या उमेदवारांनी विशेष कामगिरी करत तब्बल 27 जागा बिनविरोध जिंकल्या आहेत. सिंधुदुर्ग जिल्हा परिषदेत 8 तर पंचायत समित्यांमध्ये 17 जागांवर महायुतीने कोणतीही लढत न होता विजय मिळवला आहे. 50 सदस्यांच्या सिंधुदुर्ग जिल्हा परिषदेत भाजपचे 7 आणि शिंदे गटाचा 1 सदस्य बिनविरोध निवडून आला आहे. तसेच 100 सदस्यांच्या पंचायत समितीत भाजपचे 16 आणि शिंदे शिवसेनेचा 1 सदस्य विजयी ठरला आहे.
रायगड आणि रत्नागिरी जिल्ह्यांतूनही शिवसेनेचे दोन उमेदवार बिनविरोध निवडून आले आहेत. महाड पंचायत समितीतील सवाने-धामणे गणात अनिल जाधव यांच्या विरोधात असलेल्या उमेदवारांनी शेवटच्या दिवशी माघार घेतल्याने त्यांचा बिनविरोध विजय निश्चित झाला. त्याचप्रमाणे रत्नागिरी जिल्ह्यातील नाणीज पंचायत समिती गणातून शिंदे शिवसेनेच्या डॉ. पद्मजा कांबळे यांचीही कोणत्याही स्पर्धेशिवाय निवड झाली आहे. या घडामोडींमुळे महायुतीचा प्रभाव ग्रामीण महाराष्ट्रात अधिक बळकट झाल्याचे संकेत मिळत आहेत.
