Bank Holiday | 19 फेब्रुवारी रोजी बँका सुरू राहणार की बंद, याबाबत अनेकांच्या मनात संभ्रम आहे. विशेषतः बँकेत महत्त्वाची कामे असलेल्या नागरिकांनी आधीच खात्री करून घेणे गरजेचे आहे. विविध राज्यांनुसार सुट्ट्यांमध्ये बदल होत असल्याने अधिकृत यादी तपासणे आवश्यक ठरते.
RBI ची सुट्टी :
भारतीय रिझर्व्ह बँक (Reserve Bank of India) दरवर्षी बँक सुट्ट्यांची अधिकृत यादी जाहीर करते. या यादीत कोणत्या दिवशी कोणत्या राज्यातील बँका कोणत्या कारणामुळे बंद राहतील याची सविस्तर माहिती दिलेली असते. त्यामुळे 19 फेब्रुवारी रोजी बँक व्यवहाराचे नियोजन करत असाल, तर संबंधित शहरातील सुट्टी तपासणे अत्यावश्यक आहे.
19 फेब्रुवारीला संपूर्ण देशभरातील बँका बंद नसून केवळ महाराष्ट्र राज्यातच बँकांना सुट्टी लागू आहे. त्यामुळे महाराष्ट्रात राहणाऱ्या नागरिकांनी त्या दिवशी बँकेत जाण्याचा विचार करत असाल, तर शाखा बंद असण्याची शक्यता लक्षात घ्यावी. इतर राज्यांमध्ये मात्र बँकिंग सेवा नियमितपणे सुरू राहतील. (Bank Holiday)
Bank Holiday | शिवजयंतीनिमित्त सुट्टी आणि पुढील तारखा :
19 फेब्रुवारी हा दिवस छत्रपती शिवाजी महाराज जयंतीनिमित्त महाराष्ट्रात सार्वजनिक सुट्टी म्हणून घोषित करण्यात आला आहे. दरवर्षी या दिवशी राज्यभर विविध कार्यक्रमांचे आयोजन केले जाते. याच पार्श्वभूमीवर बँकांसह राज्यातील शाळांनाही सुट्टी जाहीर करण्यात आली आहे.
तसेच 20 फेब्रुवारी रोजी अरुणाचल प्रदेश आणि मिझोरम या राज्यांमध्ये राज्य दिनानिमित्त बँका बंद राहतील, तर इतर राज्यांमध्ये कामकाज सुरळीत सुरू राहील. 22 फेब्रुवारी रोजी रविवार असल्याने देशभरातील बँका बंद असतील. दरम्यान, शाखा बंद असल्या तरी ऑनलाइन बँकिंग, नेट बँकिंग, UPI अॅप्स, NEFT आणि RTGS सेवांद्वारे व्यवहार करता येतील. एटीएमद्वारे रोख रक्कम काढणे शक्य आहे. मात्र चेक क्लिअरन्स, रोख रक्कम जमा करणे किंवा कर्जासंबंधित प्रक्रिया यासाठी शाखा सुरू होईपर्यंत प्रतीक्षा करावी लागेल.
