Vikas Gogawale | महाड नगरपालिका निवडणूक राडा प्रकरणामुळे रायगड जिल्ह्यात राजकीय वातावरण चांगलंच तापलं आहे. या प्रकरणी गेल्या अनेक दिवसांपासून फरार असलेले शिवसेनेचे नेते भरत गोगावले यांचे सुपुत्र विकास गोगावले (Vikas Gogawale) अखेर पोलिसांसमोर हजर झाले आहेत. त्यांच्या शरणागतीनंतर पोलिसांनी तब्बल सहा तास त्यांची चौकशी केली असून, त्यानंतर त्यांना कोर्टात हजर करण्यात आलं आहे.
मुंबई उच्च न्यायालयाने फटकारल्यानंतर विकास गोगावले यांनी महाड पोलीस ठाण्यात स्वतः हजर होत कोर्टाच्या आदेशाचं पालन करणार असल्याचं स्पष्ट केलं. त्यानंतर वैद्यकीय तपासणी करून आठ जणांना अलिबाग न्यायालयात सादर करण्यात आलं. या घडामोडींमुळे महाड नगरपालिका निवडणूक राडा प्रकरण पुन्हा एकदा चर्चेच्या केंद्रस्थानी आलं आहे.
दोन्ही गटांच्या आरोपींना दोन दिवसांची पोलीस कोठडी :
पोलिसांनी विकास गोगावले (Vikas Gogawale) यांच्यासह एकूण आठ जणांची चौकशी करून त्यांना न्यायालयात हजर केलं. न्यायालयाने दोन्ही बाजूंचा युक्तिवाद ऐकून घेतल्यानंतर दोन्ही गटांच्या आरोपींना दोन दिवसांची पोलीस कोठडी सुनावली आहे. त्यामुळे या प्रकरणातील तपासाला आता अधिक गती मिळणार असल्याची शक्यता व्यक्त केली जात आहे.
या प्रकरणात शिवसेनेच्या कार्यकर्त्यांपाठोपाठ राष्ट्रवादी काँग्रेसच्या कार्यकर्त्यांनीही पोलिसांसमोर शरणागती पत्करली आहे. राष्ट्रवादी काँग्रेसचे हनुमंत जगताप, जगदीश पवार, धनंजय देशमुख आणि निलेश महाडिक यांनी देखील पोलिसांसमोर हजर होत चौकशीला सामोरे जाण्याची तयारी दर्शवली आहे. त्यामुळे या प्रकरणात दोन्ही बाजूंच्या राजकीय कार्यकर्त्यांचा सहभाग असल्याचं स्पष्ट होत आहे.
Vikas Gogawale | महाड राडा प्रकरणात तपासाला वेग :
महाड नगरपालिका (Mahad Nagarpalika) निवडणुकांदरम्यान झालेल्या राड्यामुळे शहरात तणावाचं वातावरण निर्माण झालं होतं. या घटनेनंतर पोलिसांनी मोठ्या प्रमाणात तपास सुरू केला होता, मात्र काही आरोपी फरार असल्याने तपासात अडचणी येत होत्या. आता आरोपींच्या शरणागतीनंतर पोलिस तपासाला वेग मिळाल्याचं चित्र आहे.
न्यायालयीन आदेशानंतर आरोपी पोलिसांच्या ताब्यात असून, पुढील चौकशीदरम्यान या घटनेमागील नेमकी पार्श्वभूमी, कट रचनेत कोण सहभागी होते आणि हिंसाचारासाठी जबाबदार कोण, याचा खुलासा होण्याची शक्यता आहे. महाड नगरपालिका राडा प्रकरणात येत्या काही दिवसांत आणखी महत्त्वाच्या घडामोडी समोर येण्याची शक्यता व्यक्त केली जात आहे.
