Karuna sharma l महाराष्ट्राच्या राजकारणात खळबळ उडवून देणाऱ्या एका घटनेत, करुणा शर्मा/ मुंडे (Karuna Munde) यांनी दावा केला आहे की, त्यांचे पती आणि अन्न व नागरी पुरवठा मंत्री धनंजय मुंडे (Dhananjay Munde) यांचा राजीनामा घेण्यात आला आहे. त्यांनी सांगितले की, अधिवेशनाच्या पहिल्या दिवशी या संदर्भात अधिकृत घोषणा केली जाईल.
उपोषण मागे घेण्याचे कारण :
करुणा मुंडे यांनी सांगितले की, त्या ५ मार्चपासून धनंजय मुंडेंच्या विरोधात उपोषणाला बसणार होत्या. परंतु, त्यांना विश्वसनीय सूत्रांकडून माहिती मिळाली की, दोन दिवसांपूर्वीच उपमुख्यमंत्री अजित पवार (Ajit Pawar) यांनी धनंजय मुंडेंकडून राजीनामा लिहून घेतला आहे. त्यामुळे उपोषण करण्याची गरज नाही. सोमवारी अधिवेशन सुरू होत असून, त्याआधी राजीनामा सादर केला जाईल, असेही त्या म्हणाल्या.
करुणा मुंडे यांनी माध्यमांशी बोलताना सांगितले की, धनंजय मुंडे राजीनामा देण्यास तयार नव्हते, परंतु अजित पवारांनी तो लिहून घेतला. त्यांनी मुख्यमंत्री देवेंद्र फडणवीस (Devendra Fadnavis) यांची भेट घेण्यासाठी वेळ मागितली असल्याचेही सांगितले.
दरम्यान, अर्थसंकल्पीय अधिवेशनाच्या पूर्वसंध्येला आयोजित चहापान कार्यक्रमात, अजित पवार यांनी धनंजय मुंडेंना टाळल्याचा एक व्हिडिओ व्हायरल झाला आहे. व्हिडिओमध्ये, अजित पवार हे राज्यमंत्री पंकज भोयर यांच्याशी बोलत आहेत आणि मुंडे त्यांच्या बाजूला उभे असल्याचे दिसत आहेत.
बोलणे संपल्यानंतर, पवार चहा घेण्यासाठी वळतात, तेव्हा मुंडे त्यांच्याशी बोलण्याचा प्रयत्न करतात. मात्र, पवार मुंडेंकडे दुर्लक्ष करून निघून जातात. या घटनेबाबत विचारले असता, अजित पवार यांनी, “व्हिडिओ व्हायरल होतोय?” असा प्रतिप्रश्न करत, मुंडे त्यांच्यासोबतच होते, असे सांगत त्यांनी मुंडेंना टाळल्याचा इन्कार केला.
Karuna sharma l इतर नेत्यांची प्रतिक्रिया :
दुसरीकडे, जितेंद्र आव्हाड (Jitendra Awhad) यांनी प्रतिक्रिया देताना म्हटले आहे की, “मुंडे अजिबात राजीनामा देणार नाहीत. सरकारची ८० दिवस बदनामी होत आहे, तरीही या लोकांना काही फरक पडत नाही.” संजय राऊत (Sanjay Raut) यांनी सांगितले की, “धनंजय मुंडेंना राजीनामा द्यावाच लागेल, कारण त्यांच्या जवळच्या माणसाला एका हत्या प्रकरणात सूत्रधार असल्याचे आरोपपत्रात म्हटले आहे.” मुख्यमंत्री फडणवीस यांनी, माणिकराव कोकाटे यांच्या संदर्भात, न्यायालयीन निर्णयाची प्रतीक्षा असल्याचे सांगितले.
