India vs South Africa | भारत आणि दक्षिण आफ्रिकेमधील दुसऱ्या एकदिवसीय सामन्याची आतुरता देशभरातील क्रिकेटप्रेमी अनुभवत आहेत. रांचीतील पहिल्या सामन्यात 17 धावांनी विजय मिळवत टीम इंडियाने मालिका 1-0 अशी आपल्या नावावर ठेवली आहे. त्यामुळे आता भारतासमोर दुसरा सामना जिंकून मालिका खिशात टाकण्याची सुवर्णसंधी आहे. तर दक्षिण आफ्रिकेसाठी हा सामना करो अथवा मरो प्रकारातला असून, मालिकेत टिकण्यासाठी विजय अनिवार्य आहे.
भारी धावा करणारे फलंदाज, वेगवान माऱ्यात प्रभाव दाखवणारे गोलंदाज आणि दोन्ही संघांची तगडी बॅटिंग लाईनअप यामुळे रायपूरमधील हा सामना अत्यंत रोमांचक होणार आहे. क्रिकेट चाहत्यांमध्येही हा सामना निर्णायक स्वरूपाचा असल्याने उत्सुकता शिगेला पोहोचली आहे.
कर्णधार कोण? दक्षिण आफ्रिकेची अनिश्चितता कायम :
दुसरा सामना रायपूर येथील शहीद वीर नारायण सिंह आंतरराष्ट्रीय स्टेडियमवर खेळवला जाणार आहे. टीम इंडियाचे नेतृत्व केएल राहुल करणार असून संघाची रणनीती, संयोजन आणि बेंच स्ट्रेंथ यांची कसोटी लागणार आहे. मात्र दक्षिण आफ्रिकेच्या कर्णधारपदाबाबत अद्याप स्पष्टता नाही. पहिल्या सामन्यात नियमित कर्णधार टेम्बा बवुमा विश्रांतीत होता आणि एडन मार्करामने नेतृत्वाची धुरा सांभाळली होती. (India vs South Africa)
त्यामुळे दुसऱ्या सामन्यात टेम्बा पुन्हा मैदानात येणार की एडनच नेतृत्व करणार, हे टॉसवेळीच स्पष्ट होईल. या निर्णयाचा सामन्याच्या रणनीतीवर थेट परिणाम होऊ शकतो, कारण नेतृत्वानुसार बॉलिंग-फिल्ड सेटिंग आणि बॅटिंग ऑर्डरमध्ये महत्त्वाचे बदल होऊ शकतात.
India vs South Africa | दक्षिण आफ्रिकेची परतफेड की भारताचा सलग विजय? :
पहिल्या सामन्यात टीम इंडियाने 350 धावांचे भलेमोठे लक्ष्य दिले होते. दक्षिण आफ्रिकेनेही दमदार प्रतिकार करत 332 धावा केल्या, मात्र शेवटी 17 धावांनी पराभव पत्करावा लागला. त्यामुळे आता रायपूरमध्ये आफ्रिका पहिल्या पराभवाची परतफेड करेल का, की भारत पुन्हा एकदा त्यांना रोखून मालिका जिंकेल? हा प्रश्न क्रिकेट चाहत्यांसाठी अत्यंत रोचक ठरला आहे. (India vs South Africa)
भारतासाठी या सामन्यात टॉप ऑर्डरकडून चांगल्या सुरुवातीची अपेक्षा असेल. पहिल्या सामन्यात ऋतुराज गायकवाडला फॉर्म मिळवता आला नव्हता, तर वॉशिंग्टन सुंदरलाही बॅटिंग-बॉलिंगमध्ये चमकता आले नाही. त्यामुळे या दोघांना विश्रांती देऊन नितीश कुमार रेड्डी आणि तिलक वर्मा यांना संधी मिळू शकते, अशी चर्चा आहे. मात्र अंतिम निर्णय टीम मॅनेजमेंटच घेणार आहे.
