Gauri Garje Case | डॉ. गौरी पालवे यांनी वरळी येथील निवासस्थानी गळफास घेऊन आयुष्य संपवल्यानंतर राज्यभरात या घटनेची मोठी चर्चा रंगली आहे. आत्महत्येच्या या घटनेमागे गंभीर कारणे असल्याचा आरोप तिच्या माहेरच्यांनी केला होता. दरम्यान, या प्रकरणात पती अनंत गर्जेला सत्र न्यायालयाने जामीन मंजूर केल्याने नवे वळण मिळाले आहे.
जामीन मंजुरी आणि तपासाची पार्श्वभूमी :
मंत्री पंकजा मुंडे (Pankaja Munde) यांचे वैयक्तिक सहाय्यक अनंत गर्जे यांची पत्नी डॉ. गौरी पालवे यांनी २२ नोव्हेंबर २०२५ रोजी आत्महत्या केल्याची नोंद झाली होती. घटनेनंतर पोलिसांनी अनंत गर्जे यांना ताब्यात घेत चौकशी सुरू केली. मात्र गौरीच्या कुटुंबीयांनी ही आत्महत्या नसून नियोजित हत्या असल्याचा ठाम आरोप करत प्रकरण अधिक गंभीर बनवले. यामुळे तपासासाठी विशेष तपास पथक (SIT) स्थापन करण्यात आले.
या प्रकरणी आज मुंबई (Mumbai) येथील सत्र न्यायालयात सुनावणी झाली. सुनावणीनंतर न्यायालयाने अनंत गर्जेला जामीन मंजूर केला. मृत्यूपासून अवघ्या तीन महिन्यांत जामीन मिळाल्याने या निर्णयाकडे सर्वांचे लक्ष लागले होते. प्रकरणाचा तपास अद्याप सुरू असून, पोलिसांकडून विविध पुराव्यांची पडताळणी केली जात आहे.
Gauri Garje Case | ऑडिओ क्लिप आणि कौटुंबिक तणावाचे आरोप :
६ फेब्रुवारी रोजी झालेल्या मागील सुनावणीत पोलिसांनी न्यायालयासमोर काही महत्त्वाचे मुद्दे मांडले होते. त्यांच्या मते, अनंत गर्जे यांच्या ताब्यातील काही ध्वनिमुद्रिका तपासात समोर आल्या आहेत. सुमारे २० मिनिटांच्या एका रेकॉर्डिंगमध्ये तो गौरीला मारहाण केल्याची कबुली देताना ऐकू येत असल्याचे पोलिसांनी सांगितले होते. तसेच, त्याच्या जुन्या प्रेमसंबंधाबद्दल घरच्यांना माहिती दिल्यास आत्महत्या करीन, असे दबाव टाकल्याचेही नमूद करण्यात आले. (Gauri Garje Case)
अनंत गर्जे (Anant Garje bail) आणि डॉ. गौरी पालवे यांचा विवाह फेब्रुवारी २०२५ मध्ये झाला होता. दोघांचे मूळ गाव एकच असून, रोजगाराच्या निमित्ताने ते मुंबईत स्थायिक झाले होते. गौरी या केईएम रुग्णालय (KEM Hospital) येथे दंत विभागात कार्यरत होत्या आणि त्यांच्या कामगिरीबद्दल सहकाऱ्यांकडून चांगले मत व्यक्त करण्यात आले आहे. मात्र लग्नानंतर काही काळातच घरगुती कलह, मानसिक छळ, शारीरिक अत्याचार आणि पतीचे इतर महिलांशी संबंध असल्याचे गंभीर आरोप तिच्या नातेवाईकांनी केले. त्यामुळे हे प्रकरण केवळ आत्महत्येपुरते मर्यादित न राहता कौटुंबिक हिंसाचाराच्या दृष्टीनेही तपासले जात आहे.
