Akshaya Tritiya Gold Tips | अक्षय तृतीया हा सण हिंदू धर्मात अत्यंत शुभ मानला जातो आणि या दिवशी सोनं खरेदी करण्याची परंपरा आहे. यंदा 19 एप्रिल रोजी हा सण साजरा होणार असून सकाळी 10.49 वाजता खरेदीसाठी शुभ मुहूर्त सांगितला आहे. मात्र, या दिवशी गुंतवणूक करताना काही महत्त्वाच्या गोष्टींची काळजी घेणं आवश्यक आहे, अन्यथा फसवणूक होण्याची शक्यता असते.
सोन्याची शुद्धता तपासण्याचे महत्त्वाचे नियम :
सोनं खरेदी करताना सर्वात आधी दागिन्यावर असलेलं हॉलमार्किंग तपासणं गरजेचं आहे. दागिन्यावर त्रिकोणी चिन्ह असेल तर ते ब्युरो ऑफ इंडियन स्टँडर्ड्स (Bureau of Indian Standards) द्वारे प्रमाणित असल्याचं समजलं जातं. अशा दागिन्यांची गुणवत्ता विश्वासार्ह असते, त्यामुळे खरेदी करताना हे चिन्ह असणं महत्त्वाचं ठरतं.
याशिवाय दागिन्यातील सोन्याचे प्रमाण ओळखणंही तितकंच आवश्यक आहे. उदाहरणार्थ, 22K916 म्हणजे त्या दागिन्यात 91.6 टक्के शुद्ध सोने असतं, तर 18K750 म्हणजे 75 टक्के सोने असतं. प्रत्येक दागिन्यावर असलेला HUID क्रमांकही लक्षात घ्यावा लागतो. हा सहा अंकी वेगळा नंबर असतो आणि तो दागिन्याच्या ओळखीचा महत्त्वाचा भाग असतो.
Akshaya Tritiya Gold Tips | डिजिटल आणि सोप्या पद्धतीने करा तपासणी :
आजच्या डिजिटल युगात मोबाईलच्या मदतीनेही सोन्याची शुद्धता तपासता येते. यासाठी बीआयएस केअर (BIS Care App) हे अॅप वापरता येते. या अॅपमध्ये माहिती भरल्यानंतर संबंधित दागिन्याचा तपशील, हॉलमार्किंग आणि ज्वेलरची माहिती सहज मिळते, ज्यामुळे फसवणूक टाळता येते.
याशिवाय मॅग्नेट टेस्ट ही एक सोपी पद्धत आहे. खरे सोने लोहचुंबकाला चिकटत नाही, त्यामुळे मॅग्नेटजवळ आणल्यावर जर दागिना आकर्षित झाला नाही, तर तो शुद्ध असण्याची शक्यता अधिक असते. या सर्व गोष्टींची खात्री करूनच सोनं खरेदी केल्यास आर्थिक नुकसान टाळता येऊ शकतं.
