Gas Shortage | इराण (Iran), इस्रायल (Israel) आणि अमेरिका (America) यांच्यातील भीषण युद्धामुळे जागतिक पातळीवर इंधनाची मोठी टंचाई निर्माण झाली आहे. याचा थेट फटका भारतालाही बसत असून, एलपीजी गॅसचा तुटवडा भासत आहे. वाढत्या रांगा आणि नागरिकांमधील भीतीचे वातावरण पाहता, राज्य सरकारने (State Government) गॅस एजन्सी आणि सिलेंडर वाहतूक करणाऱ्या गाड्यांना सुरक्षा पुरवण्याचा अत्यंत महत्त्वाचा निर्णय घेतला आहे.
वितरण व्यवस्थेसाठी पोलीस सुरक्षा आणि विशेष समिती
अन्न व नागरी पुरवठा विभागाने (Food and Civil Supplies Department) सर्व जिल्हा प्रशासनांना तातडीचे निर्देश जारी केले आहेत. अलीकडच्या काळात काही ठिकाणी गॅस वाटप करणाऱ्या कर्मचाऱ्यांवर आणि वितरकांवर हल्ले झाल्याच्या घटना घडल्या आहेत. त्यामुळे, घरगुती वापराच्या सिलेंडरची ने-आण करणारी वाहने, गोदामे आणि गॅस एजन्सी चालकांना तात्काळ पोलीस संरक्षण देण्याचे आदेश काढण्यात आले आहेत. जोपर्यंत राज्याची इंधन पुरवठा स्थिती पूर्वपदावर येत नाही, तोपर्यंत हे कडक धोरण लागू राहील, असे परिपत्रकात स्पष्ट करण्यात आले आहे.
इंधनाचे वितरण सुरळीतपणे आणि विनाअडथळा पार पडावे, यासाठी प्रत्येक जिल्ह्याच्या पातळीवर एका विशेष समितीची स्थापना केली जाणार आहे. या महत्त्वाच्या समितीचे अध्यक्षपद संबंधित जिल्ह्याचे जिल्हाधिकारी भूषवणार आहेत. तसेच, या समितीत पोलीस अधीक्षक किंवा पोलीस आयुक्त हे सदस्य सचिव म्हणून कामकाज पाहतील, जेणेकरून कायदा आणि सुव्यवस्थेचा प्रश्न निर्माण होणार नाही.
मुख्यमंत्र्यांचे आवाहन आणि पुण्यात उसळलेली गर्दी
राज्यात कुठेही इंधनाची कमतरता नाही, त्यामुळे नागरिकांनी घाबरून जाऊन एजन्सींबाहेर गर्दी करू नये, असे वारंवार आवाहन राज्याचे मुख्यमंत्री देवेंद्र फडणवीस (Devendra Fadnavis) यांनी केले होते. ग्राहकांना त्यांचा सिलेंडर वेळेवर घरपोच मिळेल अशी ग्वाही त्यांनी दिली होती. असे असूनही, पुणे (Pune) शहरातील नागरिकांनी मुख्यमंत्र्यांच्या या आवाहनाकडे दुर्लक्ष केल्याचे चित्र सोमवारी पाहायला मिळाले. सकाळपासूनच पुणेकरांनी सिलेंडर मिळवण्यासाठी एजन्सीच्या बाहेर लांबच लांब रांगा लावल्या होत्या.
या सद्यस्थितीवर भाष्य करताना देवेंद्र फडणवीस यांनी सांगितले की, काही राजकीय पक्ष जाणीवपूर्वक लोकांच्या मनात भीतीचे वातावरण निर्माण करण्याचे काम करत आहेत. जर अशा प्रकारे घबराट पसरली, तर लोक मोठ्या प्रमाणावर गॅसची साठेबाजी करतील आणि त्यामुळे खरोखरच परिस्थिती हाताबाहेर जाऊ शकते. नागरिकांनी कोणत्याही अफवांवर विश्वास न ठेवता केंद्र सरकारच्या (Central Government) सूचनांचे पालन करावे आणि मोदी (Modi) आपल्यासाठी सर्व व्यवस्था करत असल्यामुळे त्यांच्यावर पूर्ण विश्वास ठेवावा, अशी विनंती मुख्यमंत्र्यांनी केली आहे.
