Pinky Mali Death | बारामतीजवळ झालेल्या विमान अपघातात मृत्यू झालेल्या फ्लाइट अटेंडंट पिंकी माळी (Pinky Mali) यांच्या कुटुंबावर दुःखाचा डोंगर कोसळला आहे. तिचं पार्थिव वरळीमध्ये आणल्यानंतर कुटुंबीय, नातेवाईक आणि परिसरातील नागरिकांनी भावूक वातावरणात अखेरचं दर्शन घेतलं. पत्नीला पाहताच तिच्या पतीचा बांध फुटला आणि उपस्थितांचे डोळे पाणावले.
अपघातातील पीडितांची ओळख आणि घटना :
28 जानेवारी 2026 रोजी सकाळी बारामती विमानतळाजवळ (Baramati Airport) झालेल्या भीषण विमान अपघातात महाराष्ट्राचे उपमुख्यमंत्री अजित पवार (Ajit Pawar), त्यांचे सुरक्षारक्षक विदीप जाधव (Vidip Jadhav), फ्लाइट अटेंडंट पिंकी माळी, पायलट-इन-कमांड कॅप्टन सुमित कपूर (Captain Sumit Kapoor) आणि सेकंड-इन-कमांड कॅप्टन शांभवी पाठक (Captain Shambhavi Pathak) यांचा मृत्यू झाला. मुंबईहून बारामतीकडे येणारे लिअरजेट 45 (Learjet 45) विमान लँडिंगच्या वेळी धावपट्टीजवळ कोसळले आणि काही क्षणांतच त्याला आग लागली.
या दुर्घटनेनंतर संपूर्ण महाराष्ट्रात शोककळा पसरली आहे. अजित पवार हे राज्यातील प्रभावशाली आणि कणखर नेते म्हणून ओळखले जात होते, तर इतर पीडितांच्या कुटुंबीयांसाठीही ही घटना आयुष्य बदलणारी ठरली आहे. अचानक झालेल्या या दुर्घटनेमुळे अनेक कुटुंबांचे संसार उध्वस्त झाले असून सर्वत्र हळहळ व्यक्त केली जात आहे.
Pinky Mali Death | पिंकीच्या कुटुंबावर कोसळले दुःख :
29 वर्षीय पिंकी माळी या या अपघातात मृत्युमुखी झाल्या. त्यांच्या निधनाची माहिती मिळताच कुटुंबीयांना मोठा धक्का बसला. तिचं पार्थिव प्रथम तिच्या सासरी कळवा (Kalwa) येथे अंतिम दर्शनासाठी नेण्यात आलं. तेथे तिचा पती सोमकर यांनी जड अंत:करणाने पत्नीचं शेवटचं दर्शन घेतलं. हे दोघं तीन वर्षांपूर्वी विवाहबद्ध झाले होते आणि पिंकीच्या आवडीनुसार सोमकर कळव्यात फर्निचर व्यवसाय करत होते. दोघेही सोसायटीतील उपक्रमांमध्ये उत्साहाने सहभागी होत असत आणि सर्वांशी मिळून-मिसळून राहत असल्यामुळे परिसरात त्यांच्या जोडीचं विशेष कौतुक केलं जात होतं. (Pinky Mali Death)
यानंतर पिंकीचं पार्थिव तिच्या माहेरी वरळी (Worli) येथे नेण्यात आलं. तेथे तिच्या वडिलांना अश्रू अनावर झाले, तर पती सोमकर यांना हे दुःख सावरणं कठीण जात असल्याचं दिसून आलं. कुटुंबीय, नातेवाईक आणि शेजाऱ्यांनी मोठ्या संख्येने उपस्थित राहून तिचं अंतिम दर्शन घेतलं. दरम्यान, या अपघातात मृत्यू झालेल्या अजित पवार यांचे सुरक्षारक्षक विदीप जाधव यांचं पार्थिव रात्री उशिरा सातारा जिल्ह्यातील तरडगाव (Taradgaon, Phaltan Taluka) येथे नेण्यात आलं आणि तेथे अंत्यसंस्कार करण्यात आले.
