CSK Vs RCB l इंडियन प्रीमियर लीग 2025 मध्ये आज शुक्रवार, 28 मार्च रोजी क्रिकेटप्रेमींना सर्वाधिक अपेक्षित सामना पाहायला मिळणार आहे. चेन्नई सुपर किंग्ज आणि रॉयल चॅलेंजर्स बंगळूरु हे दोन दाक्षिणात्य संघ चेपॉक मैदानावर आमनेसामने येणार आहेत. या सामन्यात महेंद्रसिंह धोनी आणि विराट कोहली यांच्यावर संपूर्ण जगाचे लक्ष लागले आहे.
एकीकडे पाच वेळा आयपीएल विजेते ठरलेले चेन्नई सुपर किंग्ज आहेत, तर दुसरीकडे आजवर एकदाही विजेते न ठरलेले पण लोकप्रियतेत तगडे असलेले बंगळूरु आहेत. दोन्ही संघांनी आपल्या पहिल्या सामन्यात विजय मिळवलेला आहे, त्यामुळे ही लढत अधिकच रंगतदार होण्याची शक्यता आहे.
चेपॉकवर बंगळूरूची कसोटी; धोनीच्या बॅटची वाट पाहणारे चाहते :
चेन्नईच्या घरच्या मैदानावर म्हणजेच एम.ए. चिदंबरम (चेपॉक) स्टेडियमवर बंगळूरूला केवळ एकदाच विजय मिळवता आला आहे — तोही पहिल्या हंगामात, 2008 मध्ये! त्यानंतरच्या सर्व लढतींमध्ये चेन्नईने आपले वर्चस्व राखले आहे. यंदा बंगळूरूचा संघ ही परंपरा तोडेल का, याकडे सर्वांचे लक्ष लागले आहे.
चेन्नईचा संघ फिरकीपटूंनी सजलेला असून रवींद्र जडेजा, रविचंद्रन अश्विन आणि नूर अहमद सारख्या गोलंदाजांचा प्रभाव पडणार हे निश्चित आहे. यामुळे विराट कोहली आणि फिल सॉल्ट या सलामीवीरांवर मोठी जबाबदारी असणार आहे. ‘पॉवरप्ले’मध्ये आक्रमक सुरुवात करून चेन्नईच्या फिरकीपटूंवर दबाव निर्माण करण्याचा त्यांचा प्रयत्न असेल.
CSK Vs RCB l धोनी फॅन्ससाठी मोठा प्रश्न : फलंदाजीला लवकर उतरणार का? :
महेंद्रसिंह धोनीच्या चाहत्यांसाठी हा सामना नेहमीच खास असतो. परंतु मागील सामन्यात धोनी आठव्या क्रमांकावर फलंदाजीला आला आणि केवळ दोन चेंडू खेळले. आजच्या सामन्यात त्याला अधिक वेळ फलंदाजी मिळते का, हे पाहणे औत्सुक्याचे ठरेल.
चेन्नईच्या फलंदाजीची भिस्त कर्णधार ऋतुराज गायकवाड, रचिन रवींद्र, शिवम दुबे, आणि अष्टपैलू सॅम करन यांच्यावर असणार आहे. अफगाणिस्तानचा फिरकीपटू नूर अहमद याने मागील सामन्यात चार बळी घेत प्रभावी कामगिरी केली होती. त्याच्याकडून पुन्हा अशीच कामगिरी अपेक्षित आहे.
सामना कधी आणि कुठे पाहाल? :
वेळ: संध्याकाळी ७:३० वाजता
थेट प्रक्षेपण: स्टार स्पोर्ट्स 1, 1 हिंदी, जिओ सिनेमा अॅप
