Anurag Vajpayee | अमेरिकेतील प्रतिष्ठित स्वच्छ पाणी तंत्रज्ञान स्टार्टअप ग्रेडियंट (Gradiant) चे मुख्य कार्यकारी अधिकारी आणि भारतीय वंशाचे उद्योजक अनुराग वाजपेयी यांना एका हाय-प्रोफाईल वेश्याव्यवसाय प्रकरणात अटक करण्यात आली आहे. ही कारवाई अमेरिकेच्या बॉस्टन परिसरात या वर्षीच्या सुरुवातीस करण्यात आलेल्या एका स्टिंग ऑपरेशन अंतर्गत झाली आहे.
उच्चभ्रू वेश्यालयात सधन ग्राहकांचा सहभाग
न्यू यॉर्क पोस्टच्या (New York Post) अहवालानुसार, वाजपेयीसह (Anurag Vajpayee) इतर अनेक लोकांनी मासॅच्युसेट्समधील (Massachusetts) केंब्रिज (Cambridge) आणि अन्य ठिकाणी असलेल्या उच्चभ्रू अपार्टमेंट्समध्ये लैंगिक सेवांसाठी तासाला $600 (सुमारे ₹51,000) इतके पैसे दिल्याचा आरोप आहे. या प्रकरणातील न्यायालयीन कागदपत्रांमध्ये डॉक्टर, वकील, सरकारी अधिकाऱ्यांसह काही नामांकित व्यक्तींची नावे नमूद करण्यात आली आहेत.
या वेश्याव्यवसाय रॅकेटचा भांडाफोड नोव्हेंबर 2023 मध्ये झाला होता. त्या वेळी अमेरिकेच्या माजी जिल्हा अॅटर्नी जोशुआ लेव्ही (Joshua Levy) यांनी या रॅकेटबाबत माहिती देताना सांगितले होते की, “हे व्यवसाय अत्यंत गुप्ततेत आणि निवडक उच्चभ्रू वर्गासाठी चालवले जात होते.” या प्रकरणात सहभागी महिलांपैकी बऱ्याच जणी आशियाई वंशाच्या असल्याचे स्पष्ट करण्यात आले आहे.
ग्रेडियंटकडून बाजपेयींचा बचाव-
अनुराग वाजपेयी (Anurag Vajpayee) यांच्यावर लघु गुन्ह्यांचे (misdemeanor) आरोप ठेवण्यात आले असून, त्यांच्यासोबत काही इतर स्थानिक सीईओंची नावेही आता समोर आलेल्या न्यायालयीन कागदपत्रांमध्ये आहेत. अटकेनंतर ग्रेडियंट कंपनीच्या काही कर्मचाऱ्यांकडून बाजपेयी यांना पदावरून हटवण्याची मागणी होत आहे. मात्र, कंपनीने अधिकृत निवेदनात स्पष्ट केले आहे की, “आम्हाला कायदेशीर प्रक्रियेवर पूर्ण विश्वास आहे. ही वैयक्तिक बाब असून, कंपनीची मिशन आणि मूल्ये कायम आहेत.”
MIT शिक्षण, संशोधन आणि जगभरचा उदय
अनुराग बाजपेयी यांनी मॅसॅच्युसेट्स इन्स्टिट्यूट ऑफ टेक्नॉलॉजी (MIT) मधून मेकॅनिकल इंजिनिअरिंगमध्ये पीएचडी पूर्ण केली आहे. त्यांनी एमआयटी आणि युनिव्हर्सिटी ऑफ मिसुरी येथे संशोधन पदांवर काम केल्यानंतर 2013 मध्ये ग्रेडियंट या जलशुद्धीकरण स्टार्टअपची स्थापना केली. ते या कंपनीचे सह-संस्थापक आणि मुख्य कार्यकारी अधिकारी आहेत.
बाजपेयी यांचे जलसंधारण क्षेत्रातील कार्य आंतरराष्ट्रीय पातळीवर गौरवले गेले आहे. सायंटिफिक अमेरिकन (Scientific American) या नावाजलेल्या विज्ञान मासिकाने त्यांच्या संशोधनातील एक कल्पना “टॉप १० वर्ल्ड-चेंजिंग आयडियाज” म्हणून गौरवली होती. त्यांच्या नेतृत्वाखाली ग्रेडियंट ही कंपनी जगभर २५ हून अधिक देशांमध्ये जलशुद्धीकरण सेवा पुरवते आणि औद्योगिक पाण्याच्या पुर्नवापरासाठी उपाय देते.
