Silent Heart Attack | हृदयविकाराचा झटका (Heart Attack) ही एक अत्यंत गंभीर आणि जीवघेणी स्थिती मानली जाते. अनेकदा छातीत तीव्र वेदना, श्वास घेण्यास त्रास किंवा हात-खांदे दुखणे यांसारख्या लक्षणांमुळे हार्ट अटॅक ओळखता येतो आणि वेळेवर उपचार घेणे शक्य होते. मात्र, काही वेळा कोणतीही स्पष्ट लक्षणे न दिसताही हृदयविकाराचा झटका येतो, ज्याला ‘सायलेंट हार्ट अटॅक’ म्हटले जाते. हा प्रकार अधिक धोकादायक ठरतो, कारण त्याची लक्षणे सामान्य समजून त्याकडे दुर्लक्ष केले जाते.
सायलेंट हार्ट अटॅक म्हणजे काय? :
नावाप्रमाणेच, सायलेंट हार्ट अटॅक (Silent Heart Attack) हा असा हृदयविकाराचा झटका आहे, ज्याची लक्षणे इतकी सौम्य किंवा अस्पष्ट असतात की व्यक्तीला तो आल्याचे कळतही नाही. अनेकजण या लक्षणांना सामान्य थकवा, गॅस, ॲसिडिटी किंवा स्नायूंचे दुखणे समजून त्याकडे दुर्लक्ष करतात.
मात्र, लक्षणे सौम्य असली तरी, या हार्ट अटॅकमुळे हृदयाच्या स्नायूंना तितकेच गंभीर नुकसान पोहोचते, जितके सामान्य हार्ट अटॅकमध्ये होते.
Silent Heart Attack | ही आहेत छुपी आणि फसवी लक्षणे :
सायलेंट हार्ट अटॅकची लक्षणे सामान्य हार्ट अटॅकपेक्षा (Silent Heart Attack) खूपच वेगळी आणि कमी तीव्र असतात. त्यामुळे ती ओळखणे कठीण जाते. तीव्र आणि अचानक थकवा- कोणतेही विशेष कारण नसताना अचानक प्रचंड थकवा जाणवणे, ज्यामुळे दैनंदिन कामे करणेही कठीण होते, हे एक प्रमुख लक्षण असू शकते. छातीत हलका दाब किंवा अस्वस्थता- छातीत तीव्र वेदनांऐवजी हलका दाब, जळजळ किंवा काहीतरी टोचल्यासारखे वाटणे. अनेकदा याला गॅस किंवा ॲसिडिटी समजले जाते.
अचानक चक्कर येणे आणि घाम फुटणे- कोणत्याही श्रमाशिवाय अचानक चक्कर आल्यासारखे वाटणे किंवा थंड घाम फुटणे हे देखील एक महत्त्वाचे लक्षण आहे. यापैकी कोणतीही लक्षणे जाणवल्यास, त्यांना सामान्य समजून दुर्लक्ष करण्याची चूक करू नका. तातडीने डॉक्टरांशी संपर्क साधणे अत्यंत महत्त्वाचे आहे.
सायलेंट हार्ट अटॅक कसा टाळाल? :
निरोगी जीवनशैलीचा अवलंब करून सायलेंट हार्ट अटॅकचा धोका लक्षणीयरीत्या कमी करता येतो.
1. संतुलित आहार- आहारात हिरव्या पालेभाज्या, फळे आणि ओमेगा-३ फॅटी ॲसिड असलेले पदार्थ (उदा. जवस, अक्रोड) समाविष्ट करा. तेलकट, तळलेले पदार्थ आणि मिठाचे सेवन कमी करा.
2. नियमित व्यायाम- दररोज किमान ३० मिनिटे व्यायाम करणे आवश्यक आहे. चालणे, जॉगिंग, स्ट्रेचिंग, प्राणायाम आणि योगा यांसारखे व्यायाम हृदयाच्या आरोग्यासाठी अत्यंत फायदेशीर आहेत.
3. व्यसनांपासून मुक्ती- धूम्रपान आणि मद्यपान हृदयासाठी अत्यंत हानिकारक आहेत. या व्यसनांमुळे हृदयविकाराचा धोका अनेक पटींनी वाढतो, त्यामुळे ते पूर्णपणे टाळा.
