Shefali Jariwala | ‘कांटा लगा गर्ल’ म्हणून प्रसिद्ध असलेल्या अभिनेत्री शेफाली जरीवाला (Shefali Jariwala) यांच्या २७ जून रोजी झालेल्या आकस्मिक निधनाने चित्रपटसृष्टी आणि चाहत्यांना मोठा धक्का बसला आहे. ४२ वर्षीय शेफालीच्या मृत्यूनंतर, फिटनेस, सप्लिमेंट्स आणि हृदयविकाराचा धोका यावर पुन्हा एकदा गंभीर चर्चा सुरू झाली आहे. तिच्या मृत्यूचे प्राथमिक कारण कार्डियाक अरेस्ट (Cardiac Arrest) असल्याचे सांगितले जात असले, तरी पोलीस तपासात वेगवेगळे तपशील समोर येत आहेत.

शेफालीचा मृत्यू कसा झाला?

शेफालीची शुक्रवारी रात्री अचानक तब्येत बिघडली आणि छातीत दुखू लागल्याने तिला मुंबईच्या (Mumbai) बेलेव्ह्यू रुग्णालयात (Bellevue Hospital) नेण्यात आले, जिथे डॉक्टरांनी तिला मृत घोषित केले. अंबोली पोलीस स्टेशनच्या (Amboli Police Station) माहितीनुसार, डॉक्टरांनी तिचा रक्तदाब अचानक कमी झाल्याने मृत्यू झाल्याचा संशय व्यक्त केला आहे. तर पती पराग त्यागी (Parag Tyagi) याने दिलेल्या जबाबात म्हटले आहे की, फ्रिजमधील अन्न खाल्ल्यानंतर शेफाली बेशुद्ध झाली होती.

शेफालीच्या निधनानंतर, हृदयविकाराचा झटका येण्यापूर्वी शरीर देत असलेल्या ५ संभाव्य लक्षणांबद्दलचा एक व्हिडिओ सोशल मीडियावर व्हायरल होत आहे. यामध्ये अचानक थंड घाम येणे, छातीच्या वरच्या भागात आणि पाठीत दुखणे, डाव्या हातामध्ये असह्य वेदना, जबड्यात असामान्य वेदना आणि छातीवर दाब किंवा जडपणा जाणवणे या लक्षणांचा समावेश आहे. तज्ज्ञांच्या मते, अचानक थकवा, हृदयाचे ठोके वाढणे किंवा रक्तदाब कमी होणे यांसारख्या संकेतांकडे दुर्लक्ष करू नये.

सेलिब्रिटीचा मृत्यू होणे चिंताजनक बाब-

या घटनेने फिटनेसच्या अतिरेकीपणाचा मुद्दाही ऐरणीवर आणला आहे. तज्ज्ञांच्या मते, हार्ट अटॅक (Heart Attack) (रक्तपुरवठा थांबणे) आणि कार्डियाक अरेस्ट (हृदय बंद पडणे) यात फरक आहे. डॉक्टरांच्या सल्ल्याशिवाय वेट लॉस सप्लिमेंट्स घेणे किंवा गरजेपेक्षा जास्त वेळ जिममध्ये व्यायाम करणे हृदयावर अतिरिक्त ताण टाकू शकते, जे धोकादायक ठरू शकते. सामान्य व्यक्तीसाठी चालणे, योग आणि एरोबिक्स पुरेसे असल्याचेही तज्ज्ञांचे मत आहे.

अभिनेता सिद्धार्थ शुक्ला (Sidharth Shukla) याच्या मृत्यूनंतर, शेफाली जरीवालासारख्या फिट दिसणाऱ्या सेलिब्रिटीचा अशाप्रकारे मृत्यू होणे ही चिंताजनक बाब आहे. केवळ बाह्य फिटनेस आरोग्याचे संपूर्ण चित्र दर्शवत नाही, हेच या घटना अधोरेखित करतात. सध्या पोलीस या प्रकरणाचा तपास करत असून, शवविच्छेदन अहवालानंतरच मृत्यूचे खरे कारण समोर येईल.

News Title – Shefali Jariwala Death Sparks Fitness Debate