Pune Municipal Election | महापालिकेच्या निवडणुका तोंडावर येत असताना पुण्यातील राजकीय वातावरण चांगलंच तापलं आहे. अजित पवार गट आणि भाजप यांच्यातील वाद आता उघडपणे समोर येत असून, राष्ट्रवादी काँग्रेस (अजित पवार गट) नेत्या रुपाली ठोंबरे पाटील यांनी भाजपवर जोरदार शब्दांत टीका केली आहे. भाजप नेत्यांकडून अजित पवार यांच्यावर होत असलेल्या आरोपांना प्रत्युत्तर देताना रुपाली ठोंबरे पाटील (Rupali thombare patil) यांनी थेट आणि आक्रमक भूमिका घेतली आहे.

रुपाली ठोंबरे पाटील या अजित पवार गटाकडून महापालिकेची निवडणूक लढवत असून, त्यांनी स्पष्ट केलं की राज्य सरकारमध्ये महायुती असली तरी महापालिकेच्या निवडणुकीत भाजप, राष्ट्रवादी आणि शिवसेना वेगवेगळ्या ताकदीने लढत आहेत. त्यामुळे आरोप-प्रत्यारोप होणं अटळ असल्याचं त्यांनी म्हटलं.

‘सुरुवात भाजपकडूनच झाली’ :

रवींद्र धंगेकर यांच्या संदर्भात बोलताना रुपाली ठोंबरे पाटील म्हणाल्या की, भाजपचे केंद्रीय मंत्री मुरलीधर मोहोळ यांनी अजित पवार यांच्यावर टीका केली नसती, तर आम्हालाही बोलण्याची वेळ आली नसती. सुरुवात भाजपच्या केंद्रीय मंत्र्यांकडूनच झाली, त्यामुळे अजित पवार यांनी ‘जय जितेंद्र’ असं उत्तर दिलं, असं त्यांनी स्पष्ट केलं.

मुरलीधर मोहोळ (Murlidhar Mohol) यांचा उल्लेख करताना त्यांनी म्हटलं की, ते नगरसेवकावरून खासदार आणि केंद्रीय मंत्री झाले आहेत, तर अजित पवार (Ajit pawar) हे गेल्या ४० वर्षांपासून राज्याच्या राजकारणात सक्रिय आहेत. त्यामुळे राजकीय अनुभवाच्या बाबतीत अजित पवार हे वडीलधारे नेते असल्याचंही त्यांनी ठणकावून सांगितलं.

Pune Municipal Election | ‘आरोप करण्याआधी स्वतःच्या गिरेबानात पाहा’ :

भाजप नेत्यांवर टीका करताना रुपाली ठोंबरे पाटील (Rupali thombare patil) यांनी म्हटलं की, अजित पवार यांनी गुन्हेगारीवर नियंत्रण ठेवण्यासाठी कायदेशीर चौकटीत पोलीस आयुक्तांना स्पष्ट आदेश दिले आहेत. तरीही भाजपकडून आरोप केले जात आहेत. आरोप करताना आधी स्वतःच्या गिरेबानात डोकावून पाहावं, असंही त्यांनी सुनावलं.

राष्ट्रवादी पक्षाने शिक्षा झालेल्या गुन्हेगारांना तिकीट दिलेलं नाही, असा दावा करत त्यांनी भाजपवर उलट प्रश्न उपस्थित केला. भाजपने ज्यांना तिकीट दिलं आहे आणि जे सध्या फरार आहेत, त्यांच्याबाबत मुरलीधर मोहोळ कधी तोंड उघडणार, असा सवालही त्यांनी केला.

‘एक बोट दाखवताना चार बोट स्वतःकडे’ :

रवींद्र चव्हाण यांच्यावर टीका करताना रुपाली ठोंबरे पाटील म्हणाल्या की, त्यांना आधी शहाणपणा सुचला नाही का? भाजपला नेहमी ऐन निवडणुकीच्या तोंडावरच शहाणपण सुचतं, अशी खोचक टीका त्यांनी केली.

भाजपची भूमिका ही ‘वापरा आणि सोडून द्या’ अशी असल्याचा आरोप करत त्यांनी म्हटलं की, निवडणूक आली की समाजात तेढ निर्माण करायची, नको ती प्रकरणं बाहेर काढायची आणि सत्तेचा गैरफायदा घ्यायचा, हे भाजपचं धोरण आहे. जेव्हा भाजप आमच्याकडे एक बोट दाखवते, तेव्हा त्यांनी लक्षात ठेवावं की चार बोट स्वतःकडेच असतात, असा टोला त्यांनी लगावला.

‘बालिश वक्तव्ये टाळावीत’ :

प्रदेशाध्यक्ष प्रवीण दरेकर (pravin darekar) यांच्यावरही टीका करताना रुपाली ठोंबरे पाटील म्हणाल्या की, आधी ही राजकीय चौकट मोडली कोणी, याचा विचार केला पाहिजे. भाजपचे केंद्रीय मंत्री मुरलीधर मोहोळ यांनी आधी आरोप केले, त्यामुळे आम्ही त्यांना जशास तसं उत्तर दिलं, असं त्यांनी स्पष्ट केलं.

महापालिका निवडणुकीच्या पार्श्वभूमीवर असे बालिश वक्तव्ये टाळावीत, असा सल्लाही त्यांनी भाजप नेत्यांना दिला आहे. पुण्यातील महापालिका निवडणूक जसजशी जवळ येत आहे, तसतसा अजित पवार गट आणि भाजपमधील हा वाद आणखी तीव्र होण्याची चिन्हे दिसत आहेत.

News Title: Rupali Thombre Patil Slams BJP Ahead of Pune Municipal Elections, Sparks Political Clash

Rupali Thombre Patil, BJP Criticism, Pune Municipal Election, Ajit Pawar Group, Maharashtra Politics
रुपाली ठोंबरे पाटील, भाजपवर टीका, पुणे महापालिका निवडणूक, अजित पवार गट, महाराष्ट्र राजकारण