Rohit Arya | मुंबईतील (Mumbai) पवई (Powai) येथील ओलीस नाट्यप्रकरणी आता नवा ट्विस्ट आला आहे. १७ मुलांना ओलीस ठेवणारा रोहित आर्य (Rohit Arya) याच्या एन्काऊंटरवर ॲडव्होकेट नितीन सातपुते (Advocate Nitin Satpute) यांनी गंभीर प्रश्न उपस्थित केले आहेत. सरकारची दोन कोटींची थकबाकी न मिळाल्यानेच आर्यने हे पाऊल उचलले. हा एन्काऊंटर टाळता आला असता, पण तो जाणीवपूर्वक केल्याचा आरोप सातपुते यांनी केला आहे.
‘एन्काऊंटर टाळता आला असता’
ॲडव्होकेट नितीन सातपुते (Advocate Nitin Satpute) यांनी या संपूर्ण कारवाईवर प्रश्नचिन्ह उपस्थित केले आहे. त्यांच्या मते, रोहित आर्याचा (Rohit Arya) एन्काऊंटर टाळणे शक्य होते. “पोलिसांना आर्याच्या पायावर गोळी झाडून त्याला थांबवता आले असते, परंतु तसे न करता जाणीवपूर्वक त्याच्या छातीत गोळी घालण्यात आली,” असा गंभीर आरोप सातपुते यांनी केला आहे.
त्यांनी हा एन्काऊंटर म्हणजे पोलीस यंत्रणेचे अपयश लपवण्याचा प्रकार असल्याचा दावा केला. “मुलांना बंधक बनवणे हे कृत्य चुकीचेच होते, पण त्यासाठी थेट एन्काऊंटर करणे योग्य नव्हते,” असे ते म्हणाले. या प्रकरणाची सखोल चौकशी व्हावी, यासाठी आपण न्यायालयात रीट याचिका (Writ Petition) दाखल करणार असल्याचेही सातपुते यांनी स्पष्ट केले.
Rohit Arya | सरकारची थकबाकी
रोहित आर्याने हे टोकाचे पाऊल का उचलले, यामागील कारणही सातपुते यांनी उघड केले. “रोहित आर्या हा राज्य सरकारचे ‘स्वच्छता मॉनिटर’ (Swachhata Monitor) नावाचे अभियान चालवत होता. सरकारकडे त्याची दोन कोटींहून अधिकची देयके थकीत होती. ही फसवणूक झाल्याने तो प्रचंड आर्थिक तणावात होता.”
“त्याच्या मागण्या सरकारमुळेच अपुऱ्या राहिल्या,” असे सातपुते म्हणाले. ओलीस ठेवल्यानंतर रोहितने तत्कालीन शालेय शिक्षण मंत्री दीपक केसरकर (Deepak Kesarkar) यांच्याशी बोलण्याची मागणी केली होती. मात्र, चर्चा करण्याऐवजी थेट चकमक घडवण्यात आली. सातपुते यांनी पोलीस आयुक्तांनी ‘एअरगन’बाबत (Air Gun) कोणतेही वक्तव्य केले नसल्याचा मुद्दाही उपस्थित केला आहे.
