Pune News | पुण्यात सध्या गुलियन बॅरे सिंड्रोमचे (GBS) थैमान सुरू असून त्यामुळे शहरातील नागरिकांमध्ये भीतीचे वातावरण पसरले आहे. या दरम्यानच, याच सिंड्रोममुळे पुण्यातील एका तरुणाचा मृत्यू झाल्याची माहिती समोर आली आहे. पुण्यातील डीएसके विश्व (DSK Vishwa) येथे राहणाऱ्या या तरुणाचा GBS ची लागण (Infection) झाल्याने मृत्यू झाला. हा तरुण मूळचा सोलापूरचा (Solapur) असल्याचे समजते. या तरुणाच्या मृत्यूमुळे मोठी खळबळ माजली आहे.
तरुणाचा मृत्यू-
गेल्या काही दिवसांपासून पुण्यात (Pune) गुलियन बॅरे सिंड्रोम अर्थात GBS चे बरेच रुग्ण आढळले असून त्यांची संख्याही वाढली आहे. दरम्यान, याच आजाराने बाधित (Affected) एका तरुणाचा मृत्यू झाला. हा तरुण डीएसके विश्वमध्ये वास्तव्यास होता. तो मूळचा सोलापूरचा होता, पण काही काळापासून पुण्यात राहत होता. या तरुणाला काही दिवसांपूर्वी गुलियन बॅरे सिंड्रोम या आजाराची लागण झाली होती.
GBS मुळे तब्येत खालावल्याने त्याला सोलापूरच्या एका खाजगी रुग्णालयात उपचारासाठी दाखल करण्यात आले होते. त्यानंतर तो तरुण बरा होऊन काहीच दिवसांपूर्वी अतिदक्षता विभागातून बाहेरही आला होता. पण त्याला परत श्वसनाचा त्रास झाल्याने त्याचा अचानक मृत्यू झाल्याची माहिती समोर आली आहे. दरम्यान, पुण्यामध्ये (Pune) गुलियन बॅरे सिंड्रोम या आजाराची लागण झालेल्या रुग्णांची संख्या आता 73 वर पोहोचली आहे. यामधील काहींची प्रकृती गंभीर असल्याचीही माहिती समोर आली आहे. या आजारामुळे पुणे महानगर पालिका अलर्ट मोडवर असून उपाययोजना करत आहे.
गुलियन बॅरे सिंड्रोम म्हणजे काय?
गुलियन बॅरे सिंड्रोम हा एक दुर्मिळ आजार आहे. दरवर्षी 1 लाख लोकांमध्ये तो एका व्यक्तीला होतो. याचे निदान गुंतागुंतीचे असते. चेतासंस्थेच्या चाचण्या आणि पाठीच्या कण्यातील द्रवाच्या चाचण्या या आजाराच्या निदानासाठी आवश्यक असतात.
आयव्हीआयजी (IVIG) अथवा प्लाझ्मा एक्सचेंजसारख्या उपचारांमुळे रुग्णाला लवकरात लवकर मदत मिळू शकते. या आजाराचे बहुतेक रुग्ण बरे होत असले, तरी 20 टक्के रुग्णांना सहा महिन्यांनंतरही हालचालींमध्ये अडचणी येतात, अशी माहिती समोर आली आहे.
पहिली लक्षणे आणि कारणे-
जीबीएस या आजाराचे पहिले लक्षण म्हणजे अशक्तपणा आणि हातपायांना मुंग्या येणे. या आजाराचे नेमके कारण काय ते सध्या माहीत नाही. गुलियन बॅरे सिंड्रोमची कारणे पूर्णपणे समजून घेणे वैद्यकीय शास्त्रासाठी अजूनही एक आव्हान आहे. पण गुलियन बॅरे सिंड्रोमला ऑटोइम्यून डिसऑर्डर म्हणतात. गुलियन बॅरे सिंड्रोम दोन तृतीयांश रुग्णांमध्ये शस्त्रक्रिया किंवा लसीकरणानंतर सात दिवस ते पाच आठवड्यानंतर दिसून येतो. पण काही लोकांमध्ये हे संक्रमण ट्रिगरसारखे कार्य करते.
