Pune News | दिवाळीचा सण जवळ आला असून शहरात उत्साहाचे वातावरण पाहायला मिळत आहे. बाजारपेठांमध्ये दिवाळीच्या खरेदीसाठी ग्राहकांची प्रचंड गर्दी दिसत आहे. सजलेल्या बाजारांमध्ये दिवे, फुलांच्या माळा, मिठाई आणि फटाक्यांच्या दुकानांचा गजबजाट आहे. अशा पार्श्वभूमीवर पुणेकरांसाठी आता एक आनंदाची बातमी समोर आली आहे. पुण्यातील नागरिकांना दिवाळीचा आनंद अधिक जोमात साजरा करता यावा म्हणून पुणे पोलिसांनी फटाक्यांच्या दुकानांना तब्बल २४ तास खुले ठेवण्याची परवानगी दिली आहे.
पोलिस आयुक्तांचा महत्त्वाचा आदेश :
पुणे पोलिस आयुक्त अमितेश कुमार (Amitesh kumar) यांनी १३ ऑक्टोबर रोजी विशेष आदेश जारी करत २१ ऑक्टोबरपर्यंत शहरातील फटाक्यांच्या दुकानांना २४ तास कार्यरत राहण्याची परवानगी दिली आहे. या आदेशानुसार, व्यापाऱ्यांना दिवाळीच्या कालावधीत ग्राहकांना कोणत्याही वेळी फटाके विक्री करता येणार आहे. शहरातील नागरिक मोठ्या प्रमाणावर फटाके खरेदी करतात, त्यामुळे गर्दी टाळण्यासाठी हा निर्णय घेण्यात आला आहे. पोलिस प्रशासनाने या निर्णयामुळे वाहतुकीवर ताण येऊ नये आणि नागरिकांच्या सुरक्षेची काळजी घेतली जावी, यासाठी काही अटी देखील घातल्या आहेत.
पोलिस आयुक्तालयाच्या सूचनेनुसार, फटाक्यांच्या विक्रीदरम्यान सुरक्षेचे सर्व नियम काटेकोरपणे पाळणे बंधनकारक असेल. फटाक्यांच्या दुकानांमध्ये अग्निशमन यंत्रे असणे आवश्यक असून, गर्दी टाळण्यासाठी दुकानमालकांनी आवश्यक उपाययोजना कराव्यात, असे निर्देश देण्यात आले आहेत. तसेच, पेट्रोल पंप, शाळा, रुग्णालय यांसारख्या संवेदनशील ठिकाणांपासून योग्य अंतर राखूनच विक्री केंद्रे उभी करण्यात यावीत, अशी अटही प्रशासनाने ठेवली आहे.
Pune News | पुणेकरांचा उत्साह द्विगुणित :
या निर्णयामुळे पुणेकरांमध्ये मोठा उत्साह पाहायला मिळत आहे. दिवाळीच्या तयारीसाठी आधीच बाजारपेठा गजबजलेल्या असताना, आता २४ तास फटाक्यांची दुकानं खुली राहिल्याने खरेदी अधिक सोयीस्कर होणार आहे. विशेषतः नोकरी किंवा व्यवसायामुळे दिवसभर व्यस्त असणाऱ्या नागरिकांसाठी रात्रीच्या वेळेतही फटाके खरेदी करण्याची संधी मिळणार आहे. फटाक्यांचे व्यापारी देखील या निर्णयामुळे समाधानी आहेत. (Diwali 2025)
दिवाळीच्या काळात विक्री वाढेल आणि ग्राहकांची सोय होईल, असे मत अनेक व्यापाऱ्यांनी व्यक्त केले आहे. शहरात सुरक्षित आणि आनंदी वातावरणात दिवाळी साजरी करण्यासाठी पोलिस प्रशासन आणि नागरिकांनी एकत्रितपणे जबाबदारीने वागावे, असा संदेशही पोलिसांकडून देण्यात आला आहे.
पुणेकरांसाठी ही दिवाळी विशेष ठरणार आहे. पोलिस प्रशासनाच्या निर्णयामुळे उत्सवाचा आनंद अधिक वाढणार असून नागरिकांना सुरक्षित आणि सुखद दिवाळी साजरी करता येईल. फटाक्यांचा आवाज आणि दिव्यांचा झगमगाट याने यंदाची पुण्यनगरी उजळून निघणार आहे.
