Weather Update | सध्या संपूर्ण महाराष्ट्रात (Maharashtra Rain) मान्सूनपूर्व पावसाने जोरदार हजेरी लावली आहे. पुणेकरांसाठी तर ही एक खबरदारीची वेळ आहे. गेल्या काही दिवसांपासून पुणे (Pune Weather), पिंपरी-चिंचवड आणि जिल्ह्यात अनेक भागांत मुसळधार पाऊस होत आहे. शहरासह ग्रामीण भागातही दमदार पावसाने सर्वत्र ओलावा पसरवला आहे. लोणावळा, पुरंदर, हवेलीसारख्या ठिकाणी जोरदार पाऊस पडतोय.
पुणे शहरासह राज्यभरात पावसाचा इशारा
हवामान विभागाने यावर्षीच्या मान्सूनपूर्व पावसाला (Monsoon Alert) ‘ऑरेंज अलर्ट’ दिला आहे. विशेषतः रत्नागिरी, रायगड, सिंधुदुर्ग याठिकाणी पुढील तीन दिवस मुसळधार ते अतिमुसळधार पावसाचा इशारा देण्यात आला आहे. पुणे, कोल्हापूर, नाशिक आणि घाटमाथ्याच्या इतर भागांमध्येही वादळी वाऱ्यासह पाऊस पडण्याची शक्यता वर्तवण्यात आली आहे. त्यामुळे नागरिकांनी सतर्क राहण्याचे आवाहन करण्यात आले आहे.
पावसामुळे तापमानात घट झाली असून हवेत गारवा निर्माण झाला आहे. मात्र, वीज कोसळणे, जोरदार वारे आणि काही ठिकाणी दरड कोसळण्याचा धोका लक्षात घेता सर्वांनी खबरदारी घेणे आवश्यक आहे. छत्री, रेनकोट सोबत ठेवणे, अनावश्यक प्रवास टाळणे आणि शक्यतो सुरक्षित ठिकाणी राहणे गरजेचे आहे.
महाराष्ट्रात अतिवृष्टीचा धोका
या पावसामुळे शेतीला काही अंशी फायदा होणार असला, तरी अति पावसामुळे नुकसान होण्याची शक्यता नाकारता येत नाही. कोकण, विदर्भ आणि मध्य महाराष्ट्रातही पुढील काही दिवस पावसाचा जोर राहणार आहे. उत्तर कर्नाटक-गोवा परिसरात कमी दाबाचा पट्टा तयार झाल्यामुळे हा पाऊस अधिक तीव्र होण्याचा अंदाज हवामान विभागाने व्यक्त केला आहे.
एकूणच महाराष्ट्रात मान्सूनपूर्व पावसाने यंदा जोरदार सुरुवात केली आहे. मान्सून २५ मेपर्यंत केरळात पोहोचेल, असा अंदाज आहे. त्यामुळे येत्या काळात महाराष्ट्रातही पावसाचा जोर आणखी वाढण्याची शक्यता आहे. अशा वेळी प्रत्येक नागरिकाने योग्य ती काळजी घेणे आणि हवामान खात्याच्या सूचनांचे पालन करणे गरजेचे आहे.
