Andekar Komkar Gang | पुण्यातील (Pune) आंदेकर-कोमकर टोळीयुद्धात (Andekar-Komkar Gang War) एक अत्यंत धक्कादायक आणि चिंताजनक पॅटर्न समोर आला आहे. सूडाच्या भावनेने पेटलेल्या या संघर्षात, ‘भाई’ बनण्याच्या हव्यासापोटी मिसरूडही न फुटलेली, कोवळ्या वयातील मुले क्रूर मारेकरी बनत आहेत. नुकत्याच झालेल्या आयुष कोमकरच्या (Ayush Komkar) हत्येतही याच पॅटर्नची पुनरावृत्ती झाली, ज्यामुळे ही केवळ पोलिसांपुढील नाही, तर एक सामाजिक समस्या बनली आहे.
गेल्या दोन वर्षांत या टोळीयुद्धातून तीन मोठे खून :
निखिल आखाडे (Nikhil Akhade) (ऑक्टोबर २०२३), वनराज आंदेकर (Vanraj Andekar) (सप्टेंबर २०२४) आणि आयुष कोमकर (सप्टेंबर २०२५). या तिन्ही हत्यांमध्ये एक समान धागा म्हणजे, गुन्हेगारांचे कोवळे वय. या हत्यांमधील अनेक आरोपी हे अल्पवयीन किंवा नुकतेच १८-१९ वर्षांचे तरुण आहेत, मात्र त्यांनी हत्या करताना दाखवलेली क्रूरता सराईत गुन्हेगारांनाही लाजवणारी आहे.
याचे ताजे उदाहरण म्हणजे आयुष कोमकरवर गोळ्या झाडणारे यश पाटील (Yash Patil) आणि अमित पाटोळे (Amit Patole). हे दोघेही १९ वर्षांचे असून, त्यांनीच २०२३ मध्ये निखिल आखाडेची हत्या केली होती. मात्र, त्यावेळी ते अल्पवयीन असल्याने, बालसुधारगृहात काही काळ राहून ते सहज बाहेर आले आणि त्यांनी पुन्हा एकदा हत्या केली. अल्पवयीन कायद्याचा फायदा घेत, गुन्हेगारी टोळ्या या तरुणांना शार्प शुटर्स म्हणून वापरत असल्याचे स्पष्ट झाले आहे.
Andekar Komkar Gang | ‘भाई’ बनण्याचा हव्यास, समाजासाठीही एक मोठा धोका :
या तरुणांना गुन्हेगारीकडे आकर्षित करणारा मुख्य घटक म्हणजे ‘भाई’ बनण्याचा हव्यास. टोळीच्या म्होरक्यांचे सोशल मीडियावरील रिल्स आणि व्हिडिओ पाहून, त्यांच्यासारखे बनण्याच्या आकर्षणापोटी ही मुले गंभीर गुन्ह्यांमध्ये सहभागी होत आहेत. हा हव्यास केवळ टोळीयुद्धापुरता मर्यादित न राहता, समाजासाठीही एक मोठा धोका बनत चालला आहे.
या समस्येमागे सामाजिक कारणेही दडलेली आहेत. पुण्यातील महापालिकेच्या अनेक शाळा बंद पडत आहेत किंवा अपुऱ्या शिक्षकांअभावी सुरू आहेत, ज्यामुळे शाळेतून बाहेर पडणाऱ्या मुलांचे प्रमाण वाढले आहे. शिक्षणापासून दुरावलेली हीच मुले ‘भाई’ लोकांच्या आभासी प्रतिमेला भुलून गुन्हेगारीच्या अंधारात ढकलली जात आहेत. त्यामुळे, हा केवळ पोलिसांचा प्रश्न न राहता, एक गंभीर सामाजिक प्रश्न बनला आहे.
