Pune News | पुणे (Pune) शहरातील वाहनधारकांसाठी मोठा इशारा देण्यात आला आहे. वाहतूक नियमांचे उल्लंघन करणाऱ्या आणि थकीत दंड न भरलेल्या वाहनचालकांवर आता कडक कारवाई होणार आहे. शहर वाहतूक शाखेने सुमारे १९ लाख प्रलंबित चलन आणि ४०० कोटी रुपयांच्या थकीत दंडाच्या बाबतीत थेट लायसन्स निलंबनाचा पर्याय तयार केला आहे.
नोटीस पाठवण्याची प्रक्रिया :
वाहतूक पोलिसांच्या माहितीनुसार, २६ फेब्रुवारी ते १ मार्च या कालावधीत थकीत दंड असलेल्या वाहनधारकांच्या नोंदणीकृत मोबाईल क्रमांकावर अधिकृत SMS नोटीस पाठवली जाणार आहे. हे संदेश (MHPECH-G) कोडवरून येतील. नोटीस प्राप्त झाल्यानंतर ३० दिवसांच्या आत दंड न भरल्यास संबंधित वाहनधारकांवर कठोर कायदेशीर कारवाई केली जाईल.
नोटीस मिळाल्यानंतर वाहनधारकांनी दंड भरणे अत्यंत महत्त्वाचे आहे. ही प्रक्रिया वाहनधारकांना त्यांच्या थकीत दंडाची माहिती देण्यासाठी आणि दंड भरण्यास प्रवृत्त करण्यासाठी केली जात आहे. वाहनधारकांनी SMS किंवा नोटीस प्राप्त होताच त्वरित अधिकृत प्लॅटफॉर्मवरून दंड भरावा.
Pune News | थकीत दंड न भरल्यास कायदेशीर परिणाम :
अतिरिक्त पोलीस आयुक्त मनोज पाटील आणि वाहतूक पोलीस उपायुक्त हिंमत जाधव यांनी स्पष्ट केले आहे की, ३० दिवसांच्या आत दंड न भरल्यास संबंधित वाहनचालकाचा परवाना (Driving License) निलंबित करण्यासाठी प्रादेशिक परिवहन कार्यालयाकडे (RTO) प्रस्ताव पाठवला जाईल. तसेच, प्रकरण न्यायालयात दाखल होईल, ज्यामुळे वाहनधारकांना न्यायालयीन प्रक्रियेला सामोरे जावे लागेल.
वाहनधारकांना सावधगिरी बाळगावी लागणार आहे, कारण नोटीस प्रक्रियेत सायबर फसवणूक होण्याची शक्यता आहे. पोलीस APK फाईल पाठवत नाहीत, त्यामुळे कोणतीही फाइल डाउनलोड करू नये. OTP कधीही कोणासोबत शेअर करू नये. दंड फक्त अधिकृत संकेतस्थळ किंवा मोबाइल ॲपद्वारे भरावा. संशयास्पद मेसेज आल्यास जवळच्या पोलीस ठाण्याशी संपर्क साधावा.
दंड भरण्याचे मार्ग :
वाहनधारक आपला दंड अधिकृत संकेतस्थळ mahatrafficechallan.gov.in किंवा ‘पुणे ट्रॅफिक पोलीस’ (PTP) मोबाईल ॲपवरून भरू शकतात. याशिवाय, जवळच्या वाहतूक विभाग कार्यालयात जाऊन QR कोड, डेबिट किंवा क्रेडिट कार्ड वापरूनही दंड भरण्याची सोय उपलब्ध आहे.
